قازاقستاندا مۇناي وڭدەۋ زاۋىتتارى قانشا ديزەل وتىنىن وندىرەدى؟

نۇر-سۇلتان. قازاقپارات - «قازمۇناي گاز» ۇ ك» ا ق مۇناي وڭدەۋ جانە مۇناي حيمياسى دەپارتامەنتىنىڭ ديرەكتورى ماكەيەۆ دميتري پاۆلودار مۇناي وڭدەۋ زاۋىتىن جوندەۋگە قاتىستى تۇسىنىك بەردى.

ايتا كەتەيىك، بيىلعى 1- قازاننان باستاپ پاۆلودار مۇناي-حيميا زاۋىتى جوسپارلى جوندەۋ جۇمىستارىنا توقتايدى.

«ءۇش مۇناي وڭدەۋ زاۋىتىندا ديزەل وتىنىن ءوندىرۋدىڭ اعىمداعى كولەمى تاۋلىگىنە 16 مىڭ توننا شاماسىندا. سونىمەن بىرگە، ەلىمىزدە ديزەل وتىنىن تۇتىنۋدىڭ وتە جوعارى دەڭگەيى ساقتالىپ وتىر، ياعني تاۋلىگىنە 16,5 مىڭ توننا. 1- قازاندا پاۆلودار زاۋىتى جوسپارلى جوندەۋگە توقتايدى. وسى ورايدا اتىراۋ جانە شىمكەنت مۇناي وڭدەۋ زاۋىتتارىنىڭ ديزەل وتىنىن تاۋلىكتىك ءوندىرۋ كولەمى 9,5 مىڭ تونناعا جۋىق. قازان ايىندا اتىراۋ زاۋىتى 133 مىڭ توننا، ال شىمكەنت زاۋىتى 161 مىڭ توننا ديزەل وتىنىن وندىرەدى. پاۆلودار مۇناي وڭدەۋ زاۋىتى جوندەۋگە توقتاعانعا دەيىن كاسىپورىندا 27 مىڭ توننا كولەمىندە قور جيناقتالادى. سونىمەن قاتار، اي-92 بەنزينى بويىنشا 45 مىڭ توننا جانە اي-95 كە قاتىستى 2 مىڭ توننا مولشەرىندە قور جاسالادى»، - دەدى د. ماكەيەۆ ورتالىق كوممۋنيكاتسيالار قىزمەتىندە.

ونىڭ سوزىنە قاراعاندا، پاۆلودار مۇناي-حيميا زاۋىتىن ىسكە قوسۋ بيىلعى قازان ايىنىڭ سوڭىنا دەيىن بولادى. تاۋارلىق ديزەل تاۋلىگىنە 6 مىڭ توننا كولەمىندە 28- قازاننان باستاپ جونەلتىلە باستايدى.

«پاۆلودار زاۋىتىندا كۇردەلى جوندەۋ جۇمىستارى 2018-جىلدان بەرى جۇرگىزىلمەدى. وتاندىق مۇناي وڭدەۋ زاۋىتتارىندا اعىمداعى جوندەۋ جىل سايىن وتكىزىلسە، كۇردەلى جوندەۋ 3 -جىلدا ءبىر رەت اتقارىلادى»، - دەدى «قازمۇناي گاز» كومپانياسىنىڭ وكىلى.

بۇدان بۇرىن حابارلانعانداي، ەلىمىزدەگى بولشەك ساۋدا باعاسى كورشى ەلدەرگە قاراعاندا ايتارلىقتاي تومەن، بۇل تۇرعىدا ترانزيتتىك كولىكتەر ديزەل وتىنىن ساتىپ الۋى كولەمىن ارتتىرعان.