م ءا م س: باسقا وڭىردە ەم الاتىن استانالىقتاردىڭ جولاقىسى وتەلەدى

نۇر- سۇلتان. قازاقپارات - مىندەتتى الەۋمەتتىك- مەديتسينالىق ساقتاندىرۋ جۇيەسى اياسىندا ەلىمىزدىڭ باسقا وڭىرىنە بارىپ ەم الاتىن ەلوردا تۇرعىندارىنىڭ جولاقىسىنا جەڭىلدىك جاسالادى جانە تولىقتاي وتەلەدى.

بۇل تۋرالى نۇر- سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمالىم ەتتى، دەپ حابارلايدى قازاقپارات ءتىلشىسى.

«ەلوردادا كەپىلدەندىرىلگەن تەگىن مەديتسينالىق كومەك جانە مىندەتتى الەۋمەتتىك- مەديتسينالىق ساقتاندىرۋ جۇيەسىن اياسىندا جوعارى تەحنولوگياسى مەديتسينالىق قىزمەتكە مۇقتاج جاندارعا تەگىن جانە جەڭىلدىكپەن جول اقىسىن وتەۋ قاراستىرىلعان. ياعني ەلوردا تۇرعىنى باسقا قالاعا بارىپ ەم السا، ونىڭ جولاقىسىنا جەڭىلدىك جاسالادى نەمەسە بيۋدجەت ەسەبىنەن تولىق وتەلەدى. باسقا وڭىرگە بارىپ ەمدەلۋ كوبىنەسە الماتى قالاسىنا قاتىستى بولىپ وتىر. سول سياقتى جولاقىنى وتەۋ پاتسيەنتپەن قاتار ونى ەمدەۋگە الىپ بارعان جاقىن ادامى ءۇشىن دە قاراستىرىلعان»، - دەدى تيمۋر مۇراتوۆ قالالىق ءماسليحات وتىرىسىندا.

باسقارما باسشىسىنىڭ ايتۋىنشا، ەمدەلۋشىنىڭ جولاقى جەڭىلدىگى اۆتوكولىك نەمەسە پويىز ءۇشىن قاراستىرىلعان.

«مىسالى، ەلوردادان الماتىعا دەيىن ورتاشا ەسەپپەن پويىز بيلەتىنىڭ قۇنى 9030 تەڭگەنى قۇرايدى. بيىل نۇر- سۇلتان قالاسىندا پاتسيەنتتەردىڭ جولاقىسىن وتەۋگە 2 ميلليون تەڭگە ءبولىندى»، - دەيدى ول.