ساراپشى قازاقستاندا لاستانعان قالالاردى اتادى

نۇر- سۇلتان. قازاقپارات - ەلوردادا اۋا ساپاسىنا ارنالعان كونفەرەنسيادا تاجىريبەشىل ەكولوگتار قاۋىمداستىعىنىڭ ءتوراعاسى لاۋرا ماليكوۆا لاستانعان قالالار تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«قازگيدرومەت» تۇرعىن ۇيلەر ورنالاسقان جەرلەردە اۋانىڭ ساپاسىنا مونيتورينگ جۇرگىزەدى. وسى مونيتورينگ ناتيجەسى بويىنشا بىزدە ءتۇرلى لاستاۋشى زاتتارعا قاتىستى رۇقسات ەتىلگەن كونسەنتراتسيانىڭ شەكتى دەڭگەيىنەن اسىپ تۇسكەن قالالاردىڭ ءتىزىمى انىقتالدى. مىسالى، قازاقستاننىڭ ورتالىق، شىعىس، سولتۇستىك بولىكتەرىندە كوبىنە قالقىمالى زاتتار، ياعني كومىر جاعۋدان بولىنەتىن PM 2,5, PM10 كەزدەسەدى»، - دەدى ل. ماليكوۆا «ورتالىق ازياداعى اۋا ساپاسىنا مونيتورينگ» اتتى كونفەرەنسيا بارىسىنداعى باسپا ءسوز ءماسليحاتىندا.

وسى ورايدا ول ەلوردادا، الماتىدا كومىردەن گاز جاعۋعا كوشۋ جۇمىستارى ءجۇرىپ جاتقانىن ەسكە سالدى.

«ال اقتوبە، اتىراۋ قالالارىندا كۇكىرتسۋتەك جانە ۇشپا ورگانيكالىق قوسپالار بويىنشا رۇقسات ەتىلگەن كونتسەنتراتسيانىڭ شەكتى دەڭگەيىنەن اسىپ ءتۇسۋ جاعدايلارى بايقالىپ وتىر. بۇل رەتتە اتىراۋ مۇناي وڭدەۋ زاۋىتى دا اۋا ساپاسىنا ىقپال ەتەدى. بالقاش قالاسىندا دا لاستاۋشى زاتتاردىڭ شەكتى دەڭگەيدەن اسۋى تىركەلىپ جاتادى» - دەدى قاۋىمداستىق ءتورايىمى.

ونىڭ ايتۋىنشا، شىمكەنت قالاسى دا لاستانعان قالالاردىڭ قاتارىندا. بۇل قالادا ەسكى اۆتوكولىكتەردىڭ ۇلەسى جوعارى بولىپ تۇر. وسكەمەندە دە لاستانۋ جاعىنان ماسەلە بار. وسى شاھاردا ءىرى وندىرىستىك كاسىپورىندار ءوزىنىڭ اسەرىن تيىگىزىپ جاتىر.

«ەلورداداعى اۋا ساپاسىنا توقتالساق، قالادا جەكە سەكتوردىڭ ۇلەسى زور. ولار كوبىنە كومىر جاعادى. سوڭعى جىلدارى بىرتىندەپ گازعا قوسۋ جۇمىستارى ءجۇرىپ جاتىر، الايدا ۇيلەردىڭ ءبىرازى كومىر جاعادى»، - دەدى ول.

بۇدان بۇرىن حابارلانعانداي لاۋرا ماليكوۆا ەلوردادا اۋانىڭ لاستانۋىنا قانداي فاكتور اسەر ەتەتىنىن ايتقان ەدى. سونىمەن قاتار قازاقستاندا اۆتوكولىكتى تەحنيكالىق بايقاۋدان وتكىزۋگە قاتىستى جاۋاپكەرشىلىك كۇشەيتىلەدى.

اۆتور: رۋسلان عابباسوۆ