17:43, 29 - قىركۇيەك 2021 | GMT +5
مەنني پاكياو رەسمي تۇردە بوكستان كەتەتىنىن جاريالادى
نۇر- سۇلتان. قازاقپارات - فيليپپين پرەزيدەنتتىگىنە ءوز كانديداتۋراسىن ۇسىنعان 42 جاستاعى سەگىز سالماق ساناتىندا بۇرىنعى الەم چەمپيونى مەنني پاكياو ءوز جانكۇيەرلەرىنە بوكستان كەتەتىنىن رەسمي تۇردە جاريا ەتتى، دەپ حابارلايدى قازاقپارات Sports.kz-كە سىلتەمە جاساپ.
«الەمدەگى ەڭ كەرەمەت جانكۇيەرلەر مەن ەڭ ۇلى سپورتقا راحمەت! بارلىق ادەمى ەستەلىكتەر ءۇشىن راحمەت. بۇل - مەن قابىلداعان ەڭ قيىن شەشىم. ءوز ارماندارىڭىزعا ۇمتىلىڭىزدار، تىنباي جۇمىس جاساڭىزدار جانە نە بولاتىنىن باقىلاڭىزدار. قوش بول، بوكس»، - دەلىنگەن پاكياونىڭ «تۆيتتەردەگى» جاريالانىمىندا.
ەسكە سالا كەتەيىك، سوڭعى جەكپە- جەگىندە، WBC تيتۋلى ءۇشىن بولعان ايقاستا پاكياو كۇتپەگەن جەردەن كۋبالىق بوكسشى يوردەنيس ۋگاستان جەڭىلىپ قالدى. ۋگاس پەن پاكياو اراسىنداعى جەكپە- جەك لاس- ۆەگاستاعى «تي- موبايل ارەنادا» ءوتتى. 42 جاستاعى پاكياو ءۇشىن بۇل كەزدەسۋ 2019- جىلدىڭ شىلدەسىنەن بەرگى وتكىزگەن العاشقى ايقاسى ەدى. ول كەزدە پاكياو كيت تۋرماندى ۇپاي سانى بويىنشا جەڭىپ، ودان جارتىلاي ورتا سالماقتا WBA Super نۇسقاسى بويىنشا بەلبەۋدى تارتىپ العان بولاتىن.
