باقتيار ارتايەۆ بوكسشىلاردىڭ توكيوداعى ساتسىزدىگى ءۇشىن كەشىرىم سۇرادى

نۇر- سۇلتان. قازاقپارات - قازاقستان بوكس فەدەراتسياسىنىڭ باپكەرلىك ماسەلەلەر جونىندەگى ۆيتسە- پرەزيدەنتى، مەملەكەتتىك جاتتىقتىرۋشى باقتيار ارتايەۆ بوكسشىلاردىڭ توكيو وليمپياداسىنداعى ساتسىزدىكتەرى ءۇشىن كەشىرىم سۇرادى، دەپ حابارلايدى قازاقپارات ءتىلشىسى.

«ارينە، توكيو وليمپياداسىندا وتە ءساتسىز بولعان كورسەتكىشىمىز ءۇشىن كەشىرىم سۇرايمىز. الداعى ۋاقىتتا ساراپتاما، جۇيەلى جۇمىس جاسالىپ، كەلەسى وليمپيادا ويىندارىندا ءوزىمىزدىڭ بۇرىنعى كورسەتكىشتەرىمىزگە قايتا ورالىپ، جوعارى ناتيجە كورسەتەمىز دەپ سەندىرگىم كەلەدى. قولداۋلارىڭىزعا كوپ راحمەت. ءارى قاراي جۇيەلى جۇمىس جاساپ، سپورتتىق ناتيجەلەرىمىزدى كوتەرەمىز. ەشقانداي سۇراق جوق، راحمەت ايتقىم كەلەدى»، - دەدى باقتيار ارتايەۆ قازاقستان ۇلتتىق وليمپيادا كوميتەتى باس اسسامبلەياسىنىڭ وتىرىسىندا.

ايتا كەتەيىك، اتالمىش شارادا پرەمەر- ءمينيستردىڭ ورىنباسارى ەرالى توعجانوۆ مادەنيەت جانە سپورت مينيسترلىگىنە سپورت باپكەرلەرىنىڭ ايلىعىن كوتەرۋ تۋرالى تاپسىرما بەردى.

«ۇلتتىق وليمپيادا كوميتەتى مادەنيەت جانە سپورت مينيسترلىگىمەن، ءبىلىم جانە عىلىم مينيسترلىگىمەن بىرلەسىپ، جوعارى وقۋ ورىندارىندا جاڭا ءبىلىم باعدارلامالارىن دايىنداۋعا اتسالىسۋى كەرەك. سونداي- اق، مينيسترلىككە باپكەرلەردى قولداۋ، ونىڭ ىشىندە ەڭبەكاقىسىن كوتەرۋ بويىنشا ۇسىنىس دايىنداۋ كەرەك. تورتىنشىدەن، الداعى بەيجىڭ قالاسىندا وتەتىن قىسقى وليمپيادا ويىندارىندا سپورتشىلارىمىزدىڭ تابىستى ونەر كورسەتۋىن قامتاماسىز ەتۋ قاجەت. بۇل ماسەلەنى جۋىقتا ۇكىمەتتە تالقىلاعانبىز. فەدەراتسيا باسشىلارىمەن بۇل جونىندە جەكە كەزدەسۋ وتكىزەمىز»، - دەدى ۆيتسە- پرەمەر.

اۆتور: ەسىمجان ناقتىباي