سپورتشىنىڭ ولىمىنەن كەيىن اۋىر اتلەتيكا قۇراماسىنىڭ اعا باپكەرى قىزمەتىنەن شەتتەتىلدى

الماتى. قازاقپارات- اۋىر اتلەت البەرت ليندەردىڭ ولىمىنەن كەيىن قازاقستان ەرلەر قۇراماسىنىڭ اعا باپكەرى سەرگەي سەدوۆ قىزمەتىنەن بوساتىلدى، دەپ حابارلايدى قازاقپارات ءتىلشىسى.

فەدەراتسيا قۇرامانىڭ بۇرىنعى مۇشەلەرى باپكەرلىك شتابتى ايىپتاۋ تۋرالى ءىستى تەرگەۋ اياسىندا كوميسسيا قۇرىلاتىنىن ءمالىم ەتتى. وعان ساراپشىلار مەن سپورت ارداگەرلەرى ەنەدى.

«تەرگەۋ بارىسىندا كوميسسيا 2021 -جىلعى 28 - قىركۇيەكتەن باستاپ ءمان- جاي انىقتالعانعا جانە قىزمەتتىك تەرگەۋ جونىندەگى تاۋەلسىز كوميسسيا ءتيىستى قورىتىندى شىعارعانعا دەيىن ق ر ەرلەر ۇلتتىق قۇراماسىنىڭ اعا جاتتىقتىرۋشىسى سەرگەي سەدوۆتى قىزمەتىنەن شەتتەتۋ تۋرالى شەشىم قابىلدادى»، - دەلىنگەن حابارلامادا.

ەسكە سالا كەتەيىك، الماتى وبلىستىق پوليتسيا دەپارتامەنتى اۋىر اتلەت البەرت ليندەردىڭ ولىمىنە قاتىستى قىلمىستىق ءىس قوزعاعان بولاتىن. وسىعان بايلانىستى ااف تەرگەۋگە قاجەتتى بارلىق قولداۋدى كورسەتۋگە نيەتتى. قازاقستاندىق زىلتەمىرشى البەرت ليندەر 26 جاسقا قاراعان شاعىندا قايتىس بولدى.

اۆتور: الما مۇقانوۆا