باس پروكۋراتۋرا «ازيا اۆتو» باس اكسيونەرىن ىزدەۋ تۋرالى اقپاراتقا قاتىستى تۇسىنىكتەمە بەردى

نۇر- سۇلتان. قازاقپارات - قازاقستان رەسپۋبليكاسى باس پروكۋراتۋراسى «ازيا اۆتو» باس اكسيونەرى ا. م. بالۋشكيندى رەسەي فەدەراتسياسىنىڭ اۋماعىندا ىزدەۋ توقتاتىلعانى تۋرالى اقپاراتقا قاتىستى تۇسىنىكتەمەسىن بەردى، دەپ حابارلايدى قازاقپارات ق ر باس پروكۋراتۋراسىنىڭ باسپا ءسوز قىزمەتىنە سىلتەمە جاساپ.

«باس پروكۋراتۋرانىڭ ونى رەسەي فەدەراتسياسىنىڭ اۋماعىنان ىزدەۋ توقتاتىلعانى تۋرالى ەش مالىمەتى جوق»، - دەلىنگەن حابارلامادا.

قارجى مونيتورينگى اگەنتتىگى، ۇلتتىق قاۋىپسىزدىك كوميتەتى جانە ق ر ءى ءى م قىزمەتكەرلەرىنەن قۇرىلعان ۆەدومستۆوارالىق جەدەل- تەرگەۋ توبى اقشا ۇرلادى دەگەن كۇدىككە ىلىنگەن «ازيا- اۆتو» ا ق كومپانيالار توبىنىڭ باسشىلارىنا قاتىستى ق ر قىلمىستىق كودەكسىنىڭ 190-بابىنىڭ 4- ءبولىمى، 2-تارماقشاسى بويىنشا تەرگەۋ امالدارىن جۇرگىزۋدە.

«28 - شىلدەدە ا. م. بالۋشكيننىڭ («ازيا اۆتو» ا ق باس اكسيونەرى جانە كومپانيالار توبى ديرەكتورلار كەڭەسىنىڭ ءتوراعاسى) ارەكەتى ق ر قىلمىستىق كودەكسىنىڭ 190-بابىنىڭ 4- ءبولىمى، 2-تارماقشاسى بويىنشا باعالانىپ، سوت وعان قاتىستى سىرتتاي «قاماۋعا الۋ» تۇرىندە بۇلتارتپاۋ شاراسىن سانكسيالاعان. 12 - تامىزدا بالۋشكينگە حالىقارالىق ىزدەۋ جاريالانعان»، - دەپ حابارلادى ق ر باس پروكۋراتۋراسىنان. قازىرگى كەزدە تەرگەۋ ورگاندارى كۇدىكتىنىڭ ازاماتتىعىن اۋىستىرۋمەن بايلانىستى بارلىق جاعدايلاردى تەكسەرۋدە.

اۆتور: زارينا تۋعانبايەۆا