قازاقستاندا اۆتوكولىكتى تەحنيكالىق بايقاۋدان وتكىزۋگە قاتىستى جاۋاپكەرشىلىك كۇشەيتىلەدى

نۇر- سۇلتان. قازاقپارات - اۆتوكولىكتى تەكسەرمەستەن قۇجات بەرەتىن تەحنيكالىق بايقاۋ ورىندارى جاۋاپقا تارتىلادى.

بۇل تۋرالى نۇر- سۇلتان قالاسىندا اۋا ساپاسىنا ارنالعان كونفەرەنسيادا تاجىريبەشىل ەكولوگتار قاۋىمداستىعىنىڭ ءتورايىمى لاۋرا ماليكوۆا ايتتى، دەپ حابارلايدى قازاقپارات ءتىلشىسى.

«ورتالىق ازياداعى اۋا ساپاسىنا مونيتورينگ» اتتى كونفەرەنسيا بارىسىنداعى باسپا ءسوز ءماسليحاتىندا ەۋروپا ەلدەرىندە اۋانى قاتتى لاستاۋشى ديزەل وتىنىمەن جۇرەتىن كولىكتەردى شەكتەۋ ءجۇرىپ جاتقانى جانە وسىنداي قادامداردى ەلىمىزدە ەنگىزۋ مۇمكىندىگى تۋرالى سۇرالدى.

«اۋانىڭ لاستانۋىندا اۆتوكولىكتەردىڭ دە ۇلەسى بار ەكەنى بەلگىلى. ديزەل وتىنىنىڭ بەنزينگە قاراعاندا الدەقايدا لاس ەكەنىن بىلەمىز. گەرمانيانىڭ كەيبىر قالالارىنىڭ ورتالىعىندا ديزەلمەن جۇرەتىن كولىكتەردى كىرگىزبەيدى. ەندى بىزدە وسىنداي ساياساتتى الماتى قالاسىندا قاراستىرىپ جاتىر، 2019 -جىلدا تالقىلاۋلار بولدى. اتاپ ايتقاندا، ءار قالانىڭ اكىمشىلىگى ءوزىنىڭ دەڭگەيىندە كولىككە قاتىستى ءوزىنىڭ ساياساتىن بەكىتۋى كەرەك. وسى ورايدا اۋانىڭ لاستانۋىن بولدىرماۋ ءۇشىن، حالىقتىڭ دەنساۋلىعىنا زياندى ازايتۋ ماقساتىندا ديزەلمەن جۇرەتىن اۆتوكولىكتەرگە قاتىستى تالاپتاردى قويسا بولادى»، - دەدى لاۋرا ماليكوۆا.

سونىمەن قاتار ول لاستانۋعا جول بەرمەۋ ءۇشىن مەملەكەتتىك دەڭگەيدە مۇناي وڭدەيتىن زاۋىتتاردىڭ جۇمىسىن جاقسارتۋ كەرەكتىگىن ايتتى.

«ءار وتىن ءتۇرىنىڭ وزىندىك ستاندارتى بار، وسى ستاندارتتارعا كوشۋ ءۇشىن مۇناي وڭدەۋ زاۋىتتارىندا بارىنشا جاڭعىرتۋ جۇمىستارىن جۇرگىزۋ ماڭىزدى»، - دەدى قاۋىمداستىق ءتورايىمى.

بۇدان بولەك ل. ماليكوۆا اۆتوكولىكتەردى تەحنيكالىق بايقاۋدان وتكىزۋ ماسەلەسىنە توقتالدى.

«2011 -جىلدان بەرى تەحنيكالىق بايقاۋ (تەحوسموتر) تەتىگى جەكە سەكتورعا بەرىلدى. بۇعان دەيىن ونى مەملەكەتتىك سەكتور جۇرگىزسە، 2011 -جىلدان باستاپ جەكەمەنشىك كومپانيالار ىسكە اسىرىپ كەلەدى. قازىرگى ۋاقىتتا كەيبىر اۆكولىك يەلەرى ءتيىستى قۇجاتتى اقشاعا ساتىپ الۋى فاكتىلەرىنىڭ كەزدەسىپ جاتقانى وكىنىشتى جاعداي. سوندىقتان وسى ماسەلەلەردى جاۋاپتى مينيسترلىككە (يندۋستريا جانە ينفراقۇرىلىمدىق دامۋ مينيسترلىگى) جەتكىزدىك. بيىل قازان ايىندا تەحنيكالىق بايقاۋدى جۇرگىزەتىن جەكەمەنشىك كومپانيالاردىڭ جاۋاپكەرشىلىگىن ارتتىرۋ ماقساتىندا ءبىرقاتار نورمالارعا وزگەرىس ەنگىزۋ قاراستىرىلماق»، - دەدى ول.

وسى ورايدا لاۋرا ماليكوۆا اتالعان كومپانيالار تەحنيكالىق بايقاۋدان وتكەن كولىكتەرگە بەرىلگەن قۇجاتقا، كولىكتىڭ بايقاۋدان لايىقتى دەڭگەيدە وتكەنىنە جاۋاپ بەرۋى كەرەك ەكەنىن اتاپ ءوتتى.

«ياعني، مەسسەندجەرلەر ارقىلى ساتاتىن قۇجات بولماۋى كەرەك. ماماندار اۆتوكولىكتى ناقتى قاراپ، تەستىلىك سىناقتان وتكىزىپ، سونىڭ ناتيجەسىندە قۇجاتتى بەرۋى ماڭىزدى. ەگەر تەكسەرمەستەن جالعان قۇجات بەرسە، سوعان سايكەس جاۋاپكەرشىلىك قاراستىرىلادى»، - دەدى قاۋىمداستىق ءتورايىمى.

اۆتور: رۋسلان عابباسوۆ