ديماش قۇدايبەرگەن قىتايعا بارعانىن جاريالادى
«دوستار، الەمدىك شوۋ- بيزنەستەگى جۇمىسىمدى جالعاستىرۋ ءۇشىن 2 جىلدان كەيىن قىتايعا ورالعانىمدى حابارلايمىن. بۇل كەزدەسۋدى دۇنيەجۇزىلىك كارانتينگە بايلانىستى 2 جىل كۇتۋگە تۋرا كەلدى. ءبىر ايعا جۋىق ۋاقىتتى وقشاۋلانۋدا وتكىزدىم، وسى مەرزىم ىشىندە قىتايداعى كومانداممەن ىسكە اسىراتىن كوپتەگەن جوسپار قۇرىپ قويدىم»، - دەپ جازدى ءانشى.
ديماش سونداي- اق ەگەر كارانتينگە بايلانىستى تىيىم بولماسا الەمنىڭ بارلىق ەلىندەگى ءتۇرلى كونسەرتتەر مەن تەليەۆيزيالىق تۇسىرىلىمدەرگە قاتىساتىنىن ايتتى.
«ءيا، الەمدەگى كارانتين مەنىڭ جوسپارلارىما اسەر ەتتى. ءبىراق وسى ساتتەن باستاپ سىزدەردى شىعارماشىلىعىممەن ودان دا كوبىرەك قۋانتاتىن بولامىن. سىزدەردى جاقسى كورەمىن!»، - دەدى د. قۇدايبەرگەنوۆ.
ەسكە سالايىق، بۇعان دەيىن ديماش «King Choice « رەيتينگىندە (ازياداعى ەڭ سىمباتتى 100 جىگىتى) كوش باستاپ تۇرعانىن جازعان ەدىك. Kingchoice.me سايتىندا جۇرگىزىلىپ جاتقان داۋىس بەرۋ 30-قىركۇيەك كۇنى اياقتالادى. سونداي- اق ول رەسەيدىڭ سوچي قالاسىنداعى «نوۆايا ۆولنا 2021» فەستيۆالىندە قوبىزدىڭ سۇيەمەلدەۋىمەن ءان ايتىپ، جاڭا كومپوزيتسيالاردىڭ تۇساۋىن كەستى.
