استانادا باحرەين كورولدىگىمەن بىرلەسىپ سالىنعان مەكتەپ- گيمنازيا اشىلدى
اناتولي حراپاتىي كوشەسىندە ورنالاسقان جاڭا مەكتەپ 1200 وقۋشىعا ارنالعان. وقۋ ورنىنىڭ رەسمي اشىلۋ سالتاناتىنا ەلوردا اكىمىنىڭ ورىنباسارى اسحات ورالوۆ جانە كورولدىك گۋمانيتارلىق قورىنىڭ باس حاتشىسى مۇستافا ءال- سايد باستاعان باحرەين كورولدىگىنىڭ دەلەگاتسياسى قاتىستى.
«بيىل ەلىمىز ءۇشىن ەرەكشە جىل. ەل تاۋەلسىزدىگىنىڭ 30 جىلدىعىن اتاپ وتۋدەمىز. مەرەيتوي قارساڭىندا ەلوردادا ۇلكەن جانە اۋقىمدى مەكتەپتىڭ قۇرىلىسى اياقتالىپ، وقۋ پروتسەسى باستالدى. وقۋشىلار مەن پەداگوگتەردى ءداستۇرلى فورماتتا وقۋ جىلىنىڭ باستالۋىمەن قۇتتىقتايمىز. پاندەمياعا بايلانىستى وقۋشىلار 1,5 جىلدان استام ۋاقىت قاشىقتان وقۋعا ءماجبۇر بولدى. قازىر وقۋشىلاردىڭ جوعارى دەڭگەيدە ءبىلىم الۋى ءۇشىن بارلىق جاعداي جاسالعان. ءبىز ءارقاشان وسىنداي يدەيالار مەن الەۋمەتتىك جوبالاردى قولداۋعا دايىنبىز. بولاشاقتا باۋىرلاس ەلدەرمەن وسىنداي جوبالاردى ودان ءارى جۇزەگە اسىرۋدى جوسپارلاپ وتىرمىز»، - دەدى اسحات ورالوۆ.
ءوز كەزەگىندە مۇستافا ءال- سايد قالا تۇرعىندارىن قازاقستان تاۋەلسىزدىگىنىڭ 30 جىلدىعىمەن قۇتتىقتاي وتىرىپ، ەلىمىزدىڭ قارقىندى دامۋى مەن جەتىستىكتەرىنە تاڭدانىسىن ءبىلدىردى.
«وسى مەكتەپتىڭ اشىلۋىنا قاتىسقانداردىڭ بارىنە، قالا اكىمدىگىنە العىس ايتقىم كەلەدى. ويتكەنى ءبىز بۇل مەكتەپتىڭ قازاقستانداعى، سونداي- اق ازياداعى ەڭ ۇزدىك جانە ادەمى مەكتەپتەردىڭ ءبىرى بولۋى ءۇشىن قولدان كەلگەننىڭ ءبارىن جاسادىق. مەكتەپتە اراب ءتىلىن ۇيرەنۋگە ارنالعان مۇراجاي مەن كابينەت بار. مۇندا ەلىمىزدىڭ مادەنيەتى مەن داستۇرلەرى تۋرالى بىلۋگە بولادى. بۇل مەكتەپ مادەنيەت پەن عىلىمنىڭ ورتالىعى بولىپ ەسەپتەلەدى. قازاقستان مەن باحرەين كورولدىگىنىڭ اراسىنداعى بايلانىس وتە تىعىز»، - دەپ اتاپ ءوتتى باحرەين كورولدىگىنىڭ كورولدىك گۋمانيتارلىق قورىنىڭ باس حاتشىسى.
جاڭا مەكتەپ عيماراتىندا 62 كابينەت جانە 11 زەرتحانا بار. مۇندا ەڭبەك كابينەتتەرى، قىش شەبەرحاناسى، 418 ورىندىق اسحانا، سپورت جانە اكت زالدارى، كوۆوركينگ ايماعى، لينگۆيستيكالىق كابينەتتەر جانە تاعى باسقالارى بار. مەكتەپتىڭ وقۋ ءتىلى - قازاق جانە ورىس. وقۋ ورنى كوپتىلدىلىك ءپرينتسيپى بويىنشا جۇمىس ىستەيدى. مۇندا نەگىزگى ەكى تىلدەن بولەك، اراب، فرانسۋز جانە نەمىس تىلدەرى دە وقىتىلادى. عيماراتتىڭ ءۇشىنشى قاباتىندا 5 ەلدىڭ - قازاقستان، باحرەين كورولدىگى، ۇلى بريتانيا، فرانسيا، گەرمانيا مادەنيەتىن دارىپتەيتىن مەكتەپ مۇراجايى ورنالاسقان. وسى مۇراجايدا بالالار كوپتىلدىلىك داعدىلارىن دامىتادى، پوليگلوتتار كلۋبى جۇمىس ىستەيدى. سونىمەن قاتار، مەكتەپ كىتاپحاناسىندا 5 ەلدىڭ كوركەم ادەبيەتىن تابۋعا بولادى. قازىر مەكتەپتە 1370 بالا وقيدى. وقىتۋ - تەگىن.
ايتا كەتەيىك، 2021 -جىلى نۇر- سۇلتاندا بارلىعى 15 مەكتەپ پايدالانۋعا بەرىلەدى، بۇل 40 مىڭنان استام وقۋشى ورنىن قۇرايدى. ولاردىڭ كوپشىلىگى اشىلدى.
