كارتوپ وسىرۋشىلەردىڭ قارقىنى جوعارى

نۇر-سۇلتان.قازاقپارات -«اگروترەيد كوكشە» ج ش س ون بەس جىلعا جۋىق كارتوپ جانە كوكونىس وسىرۋمەن اينالىسىپ، ءتاپ- ءتاۋىر تاجىريبە جيناقتاپ قالعان ۇجىم. ادال ەڭبەكتەرى ارقىلى بيىل دا مول ءونىم جيناۋدا.

كراسنويار اۋىلىنداعى سەرىكتەستىك القاپتارىندا ەكىنشى نان ەسەبىندەگى كارتوپتىڭ شىعىمى جاقسى. شارۋاشىلىق بيىل 300 گەكتار القاپقا كارتوپ، 30 گەكتار جەرگە ءسابىز وتىرعىزعان بولاتىن. مول ءونىم جيناۋدى ماقسات تۇتقان ۇجىم تيىمدىلىگى الدەقاشان دالەلدەنگەن گوللاندىق تەحنولوگيانى پايدالانۋدا. كارتوپ القاپتارى امەريكالىق «ۆالەي» فيرماسىنىڭ قوندىرعىلارىمەن سۋارىلادى.

- سۋارمالى ەگىستىك القاپتارىنان مول ءونىم جيناۋعا ابدەن بولادى، - دەيدى سەرىكتەستىك باسشىسىنىڭ ورىنباسارى قايرات جاندايەۆ، - ويتكەنى، تابيعاتقا تاۋەلدىلىك از. ەگەر ەڭبەگىڭە ساي ءونىم العىڭ كەلسە، سۋارىپ كۇتىپ، باپتاۋ كەرەك. ەندىگى ءبىر ماسەلە تۇقىمعا قاتىستى. ءبىز گالا، پيكاسسو، ۆەگا، سورايا ءتارىزدى تۇقىمدى گەرمانيا مەن گوللانديادان ساتىپ الامىز. وندىرىلگەن ءونىم گوللاندىق تەحنولوگيا بويىنشا سالىنعان قويمالاردا ساقتالادى. كۇزدە كارتوپ كوپ، ال، كوكتەمدە سۇرانىس وسە تۇسەدى. نەگىزى تۇتىنۋشىلاردىڭ سۇرانىسىن جىل بويى وتەپ تۇرۋىمىز كەرەك.

مول ءونىم وڭىردەگى كارتوپ پەن ءسابىزدىڭ باعاسىن وسىرمەۋگە ىقپال ەتەدى. مەملەكەت تاراپىنان كورسەتىلىپ جاتقان كومەك تە از ەمەس. وسىمدىك شارۋاشىلىعىن سۋبسيديالاۋ تۇرىندەگى مەملەكەتتىك قولداۋدىڭ شاراپاتىن كورىپ وتىر. سەرىكتەستىك باسشىسى ورىنباسارىنىڭ ايتۋىنا قاراعاندا، شەتەلدەن جەتكىزىلگەن تۇقىم، مينەرالدىق تىڭايتقىش ءۇشىن دە سۋبسيديا العان.

ازىرگە كارتوپ پەن ءسابىز ەگىلگەن القاپتاردىڭ جارتىسى جينالدى. سەرىكتەستىك اگرونومى داۋلەت ءجۇسىپوۆتىڭ ايتۋىنا قاراعاندا، ءار گەكتاردان ورتاشا ەسەپپەن 25 توننادان كارتوپ جينالۋدا. ونىمدىلىگى جوعارى 4 شەتەلدىك كومباين توقتاۋسىز جۇمىس ىستەۋدە. ۆلاديمير چەرۆياكوۆ، جومارت كەنجەبايەۆ، ەركىن بەكجانوۆ، مۇسىرەپ ەسمۇحانوۆ ءتارىزدى كومباينشىلار تاۋلىكتىك جوسپارلارىن ۇنەمى اسىرا ورىندايدى.

- ءتورت كومباين كۇنىنە 20 گەكتارعا جۋىق كارتوپتى جيناپ الا الادى، - دەيدى سەرىكتەستىك اگرونومى، - كارتوپ ءوسىرۋدىڭ دە قىر- سىرى كوپ قوي. القاپتارعا ۋاقىتىندا مينەرالدى تىڭايتقىشتاردى سىڭىرەمىز، ارامشوپتەرمەن كۇرەسەمىز. ءپىسىپ- جەتىلگەن كەزدە ساباعىن شاۋىپ الۋ كەرەك. شارۋا شاش- ەتەكتەن، ايتسە دە جۇزدەن استام ادام جۇمىس ىستەيتىن شارۋاشىلىقتىڭ ەڭبەككە دەگەن ىنتاسى جاقسى.

داستارحانعا قويىلاتىن تاعام تۇرلەرىن مولايتۋعا ۇمتىلعان ۇجىم قوڭىر كۇزدە ەڭبەك قارقىنىن ۇدەتە تۇسكەن. ونسىز بولمايتىن سىڭايلى. ارقانىڭ اق جاۋىنىنا ىلىگىپ قالماۋى ءۇشىن اتقا قامشىنى باسىپ- اق جاتىر.

egemen.kz