ماجىلىستە وڭىرلەردە ساپاسىز سالىنعان مەكتەپتەر ماسەلەسى كوتەرىلدى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات باۋىرجان سارتبايەۆ جاڭا مەكتەپتەردىڭ قۇرىلىسىن باقىلاۋ قۇزىرەتتىلىگىن ءبىلىم جانە عىلىم مينيسترلىگىنە بەرۋدى سۇرادى، دەپ حابارلايدى قازاقپارات ءتىلشىسى.

«Nur Otan پارتياسى فراكسياسىنىڭ دەپۋتاتتارى جازعى حالىقپەن كەزدەسۋ اياسىندا ءبىلىم بەرۋ وبەكتىلەرىنىڭ قۇرىلىسىمەن تانىسىپ، بۇگىنگى تاڭدا مەملەكەتتىك قاراجات ەسەبىنەن مەكتەپ قۇرىلىسىنىڭ ساپاسىنا، ونىڭ ىشىندە جاڭا ءبىلىم مازمۇنىنا سايكەستىگىنە، وقۋشىلاردىڭ فۋنكسيونالدى ساۋاتتىلىعىن دامىتۋىنا، پاندىك كابينەتتەرمەن جابدىقتالماۋى، قوسىمشا ءبىلىم بەرۋ جۇمىسىن ۇيىمداستىرۋعا مۇمكىندىكتەردىڭ قۇرىلىس كەزىندە قاراستىرىلماۋىنا قاتىستى الاڭداۋشىلىعىن بىلدىرەدى. 2021 -جىلدىڭ 7-قىركۇيەگىندە قازاقستان رەسپۋبليكاسى پارلامەنت ءماجىلىسىنىڭ مادەني- الەۋمەتتىك دامۋ كوميتەتىنە بيۋدجەتتى تالقىلاۋ اياسىندا 800 مەكتەپتىڭ قۇرىلىسىنىڭ بارىسى تۋرالى بايانداعان ق ر ءبىلىم جانە عىلىم ۆيتسە-ءمينيسترى ب. اسىلوۆانىڭ: «ءبىلىم جانە عىلىم مينيسترلىگىندە اتالعان مەكتەپتەردىڭ قۇرىلىسىنىڭ بارىسىن كورۋ جانە باقىلاۋ، كۇن سايىن مونيتورنيگ جۇرگىزۋ قۇزىرەتتىلىگى جوق. بۇل تۋرالى بىرنەشە مارتە ايتىپ كەلەمىن. بىزدە مەكتەپتەردىڭ دايىندىق دەڭگەيىن قارايتىن ءتىپتى قۇرىلىسشى ماماندار دا جوق»، - دەگەن جاۋابىنان كەيىن الاڭداۋشىلىق ودان ءارى تەرەڭدەي ءتۇستى»، - دەدى ب. سارتبايەۆ پرەمەر-ءمينيستردىڭ ورىنباسارى ەرالى توعجانوۆتىڭ اتىنا جولداعان ساۋالىندا.

وسى ورايدا ول جاڭا مەملەكەتتىك جالپى ءبىلىم بەرەتىن مەكتەپتەردىڭ ءتيىستى قۇرال- جابدىقتارسىز، اتاپ ايتقاندا، حيميا، فيزيكا، بيولوگيا، گەوگرافيا جانە ۇيىرمە كابينەتتەرىنسىز پايدالانۋعا بەرىلۋى قانشالىقتى قيسىندى ەكەنىن سۇرادى. وسى سەبەپتى وقۋ قىزمەتىنە ليتسەنزيانى ۋاقىتىندا الا المايتىن مىسالدار بار.

سونىمەن قاتار، جالپى ءبىلىم بەرەتىن مەكتەپتەر جان باسىنا شاققانداعى قوسىمشا بيۋدجەتتىك قاراجاتتى پايدالانۋ ارقىلى وبەكتىنىڭ باستاپقى ەكسپلۋاتاتسياسى كەزەڭىندە جابدىق ساتىپ الۋعا ءماجبۇر. الايدا، بۇل ماسەلە مەملەكەتتىك- جەكەمەنشىك ارىپتەستىك جاعدايىنداعى مەكتەپتەر قۇرىلىسىندا جانە جەكە ينۆەستيسيالاردىڭ مەكتەپ قۇرىلىسىندا وڭ شەشىلگەن.

«مەملەكەتتىك مەكتەپتەردە قاراپايىم حالىقتىڭ بالالارى وقيتىن ەسكەرسەك، بۇل ءبىلىم بەرۋ مەكەمەلەرىندە باستاپقى قۇرىلىسى كەزىندە پاندىك كابينەتتەردى جوسپارلاۋعا، سول ارقىلى وقۋ پروتسەسىن ساپالى ۇيىمداستىرۋعا، بالانىڭ تۇلعاسىن جان- جاقتى دامىتۋعا نە كەدەرگى؟ وسىعان بايلانىستى «Nur Otan» پارتياسىنىڭ مۇشەلەرى ۋاكىلەتتى ورگانعا ۇسىنىس جاسادى:

- بىرىنشىدەن، وقۋشىلاردىڭ ورىن تاپشىلىعى دەڭگەيىنىڭ ناقتى قاجەتتىلىكتەرىنە سايكەس مەكتەپتەردى جوبالاۋ، قۇرىلىسىن بولجاۋ جانە جاڭارتۋدى ساراپتامالىق ساپالى دەڭگەيدە جوسپارلاۋ قاجەت.

- ەكىنشىدەن، اۋىلدىق جەرلەردەگى مودۋلدىك مەكتەپتەردىڭ تيپتىك جوبالارىن دايىنداۋ بويىنشا تۇسىنىكتەمە بەرۋدى كەرەك.

- ۇشىنشىدەن، مەملەكەتتىك قاراجات ەسەبىنەن مەكتەپتەردىڭ قۇرىلىسى كەزىندە قولايلى ءبىلىم بەرۋ ورتاسىن قۇرۋدى ەسكەرۋ قاجەت. مەكتەپ باسشىلارى عيمارات سالۋ كەزىندە 2 سپورت زالدى قاراستىرۋدى سۇرايدى. ول ءۇشىن، نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزۋ، ءبىلىم بەرۋ ۇيىمدارىن پاندىك كابينەتتەر جانە قوسىمشا ءبىلىم الۋعا ارنالعان قۇرال- جابدىقتار ءارى جيھازدارمەن تولىق جابدىقتالۋدى قامتاماسىز ەتۋدى قاراستىرۋ قاجەت.

- تورتىنشىدەن، وقۋشىلاردىڭ ورىن تاپشىلىعىن شەشۋگە باعىتتالعان زاماناۋي ءبىلىم بەرۋ ورتاسىن قۇرۋ جانە ساپالى ءبىلىم الۋىنا تەڭ قولجەتىمدىلىگىن قامتاماسىز ەتۋ ماسەلەسى ءبىلىم جانە عىلىم مينيسترلىگىنىڭ قاراۋىندا ەكەندىگىن ەسكەرىپ، جاڭا مەكتەپتەردىڭ قۇرىلىسىن باقىلاۋ قۇزىرەتتىلىگىن دە وسى ورتالىق مەملەكەتتىك ورگانعا بەرۋ سۇرالدى.

اۆتور: رۋسلان عابباسوۆ