دەپۋتات «ديپلوممەن اۋىلعا» باعدارلاماسىنداعى كەمشىلىكتەر تۋرالى ايتتى

نۇر-سۇلتان. قازاقپارات - پالامەنت ءماجىلىسىنىڭ جالپى وتىرىسىندا دەپۋتات ءسالىمجان ناقپايەۆ اۋىلداردا مەديتسينالىق مامانداردىڭ جەتىسپەۋشىلىگى ماسەلەسىنە قاتىستى پرەمەر-ءمينيسترىنىڭ ورىنباسارى ەرالى توعجانوۆتىڭ اتىنا ساۋال جولدادى، دەپ حابارلايدى قازاقپارات ءتىلشىسى.

«سوڭعى كەزدە مينيسترلىك، وبلىس اكىمدىكتەرى تاراپىنان اۋىلدىق ەلدى مەكەندەرگە مەديتسينا ماماندارىن تارتۋعا ءبىرقاتار جۇمىستار اتقارىلۋدا. مامانداردى اۋىلدارعا جۇمىسقا جىبەرەتىن «ديپلوممەن اۋىلعا» باعدارلاماسى جۇمىس جاساۋدا. جەرگىلىكتى اكىمدىكتەردەن كوتەرمە جاردەماقى بەرىلۋدە. سوعان قاراماستان، وبلىستاردا، سونىڭ ىشىندە شالعاي اۋدانداردا كەيبىر دارىگەر ماماندار ءالى دە جەتىسپەيدى. مىسالى، كەز-كەلگەن مەديتسينالىق وتالاردا وتە قاجەتتى انەستەزيولوگ- رەانيماتولوگ، سول سياقتى ينفەكسيونيست، تراۆماتولوگ، پۋلمانولوگ، ەندوكرينولوگ سياقتى ماماندار كوپتەگەن اۋدانداردا جەتىسپەيدى. COVID-19 سياقتى اۋىر ناۋقاستان جازىلعان ادامدارعا رەابيليتولوگ قاجەت. ول مۇلدەم جوقتىڭ قاسى. ولاردى ايتپاعاندا، اكۋشەر-گينەكولوگ، حيرۋرگ، فتيزياتور سياقتى ماماندار دا شالعاي اۋدانداردا جەتپەي جاتىر»، - دەدى س. ناقپايەۆ.

ونىڭ ايتۋىنشا، الىس اۋدانداردا وسىنداي كادر جەتىسپەۋىنە بايلانىستى وزدەرىنە كەلىپ تۇسكەن ناۋقاستاردى سانيتارلىق- اۆياتسيا شاقىرتىپ، وبلىس ورتالىقتارىنا جىبەرۋدى جيىلەتكەن. بۇنىڭ بارىنە بيۋدجەتتەن قاراجات كەرەك. بۇل قازاقستان رەسپۋبليكاسىنىڭ بارلىق وبلىستارىنا ءتان پروبلەما.

«جاعدايدىڭ بۇلايشا ۋشىعۋىنا گرانت بويىنشا وقىعان مەديتسينالىق جوعارى وقۋ ورىندارىنىڭ كەيبىر تۇلەكتەرىنىڭ مىندەتتى ءبولۋ ادىسىنە باعىنباي، وزدەرى بولىنگەن بولاشاق جۇمىس ورىندارىنا بارماي قالۋلارى دا سەبەپتەرىن تيگىزۋدە. سونىمەن قاتار، مەديتسينالىق جوعارى وقۋ ورىندارى ءۇشىن بولىنەتىن گرانت سانى تۇسىنىكسىز سەبەپتەرمەن 2020 -جىلى ازايىپ كەتكەن»، - دەدى دەپۋتات.

وسى ايتىلعاندار اياسىندا كەلەسى پروبلەمالاردى شەشۋ سۇرالدى:

1. «Nur Otan» پارتياسىنىڭ 2025 -جىلعا دەيىنگى سايلاۋالدى باعدارلاماسى جول كارتاسىنىڭ ورىندالۋىنا سايكەس، كوزدەلىپ وتىرعان 2021 -جىلدان باستاپ مەديتسينالىق جوعارى وقۋ ورىندارىنا گرانتتار سانىن ۇلعايتۋدى ۇتىمدى پايدالانىپ، كادر جەتىسپەۋ ماسەلەسىن شەشۋ؛

2. گرانتپەن وقىعان تۇلەكتەردىڭ وزدەرىنىڭ بولاشاق جۇمىس ورىندارىنا سەبەپسىز بارماي قالۋلارىن توقتاتۋ؛

3. گرانت بولگەندە مەديتسينالىق ماماندار جەتىسپەيتىن ايماقتارعا كۆوتا سانىن كوبەيتۋ؛

4. اۋىلدىق ەلدى مەكەندەردەگى جالپى پراكتيكا دارىگەرلەرىن بىلىكتىلىگىن ارتتىرۋ كۋرستارىنا جىبەرۋ ارقىلى اۋىلدىق جەرگە كەرەكتى مەديتسينالىق ماماندىقتاردى الۋعا مۇمكىنشىلىك قاراستىرۋ.

اۆتور: رۋسلان عابباسوۆ