13:06, 16 - قىركۇيەك 2021 | GMT +5
مۇناي باعاسى كۇرت ءوستى
نۇر-سۇلتان. قازاقپارات - الەمدىك مۇناي قىمباتتاپ، رەكورد ورناتتى. لوندونداعى ICE بيرجاسىندا برەنت ماركاسىنىڭ قاراشا فيۋچەرستەرى شامامەن %2 كە ءوستى.
باررەلدىڭ باعاسى 75 دوللاردان اسىپ ءتۇستى. WTI فيۋچەرستەرىنىڭ قۇنى دا كوتەرىلدى. قارا التىننىڭ بۇل ماركاسى باررەلىنە 72 دوللار توڭىرەگىندە ساتىلدى.
رەيتەر ساراپشىلارى «قارا التىننىڭ» قىمباتتاۋىن مەكسيكا شىعاناعىنداعى «يدا» داۋىلىنىڭ سالدارىمەن بايلانىستىرادى. تامىزدىڭ اياعىندا قاتتى داۋىلدىڭ سالدارىنان قايراڭدا ءوندىرۋ جانە وڭدەۋ ۋاقىتشا توقتاتىلدى. ال قازىر شىعاناق جاعالاۋىنا جاڭا «نيكولاس» تروپيكالىق داۋىلى كەلدى. ايماقتاعى ءوندىرىس داۋىل ماۋسىمى اياقتالعاننان كەيىن عانا قايتا باستالۋى مۇمكىن دەيدى ساراپشىلار.
