تابيعاتتىڭ توسىن مىنەزىنەن ءبىرقاتار ەل ابىگەرگە ءتۇستى

نۇر-سۇلتان.قازاقپارات - يدا داۋىلىنان كەيىن ەسىن ەندى جيىپ كەلە جاتقان ا ق ش حالقىن نيكولاس اتتى تروپيكالىق دولى جەل قىسپاققا الدى.

بۇل جىل باسىنان بەرگى سەگىزىنشە داۋىل. بۇدان بولەك جەرگىلىكتى تۇرعىنداردى ورمان ءورتى دە الەككە سالعان. وسىعان بايلانىستى بيىل تابيعات اپاتتارىنان كەلگەن شىعىن رەكوردتىق كورسەتكىشكە جەتۋى مۇمكىن. ا ق ش- تان بولەك تاعى بىرنەشە مەملەكەتتە تابيعات توسىن مىنەز تانىتتى. قازىر ءۇندىستاندا جاڭبىر ماۋسىمى. ول جازدا باستالىپ، قىركۇيەككە دەيىن جالعاسادى. ياعني تۇرعىندار تابيعاتتىڭ بۇل قۇبىلىسىنا ۇيرەنىپ قالعان. الايدا سوعان قاراماستان جىل سايىن ونداعان ادام زارداپ شەگەدى.

بيىلدىڭ وزىندە 100 دەن استام ادام سۋعا كەتكەن. اسىرەسە ەلدىڭ باتىسىنداعى گۋدجارات شتاتىنداعى جاعداي كۇردەلى. مۇندا تاسقىننان 44 ەلدى مەكەندە تۇراتىن ءبىر جارىم ميلليوننان اسا ادام زارداپ شەككەن. كوشەدەگى سۋ بەلدەن كەلەدى. سوندىقتان تۇرعىندار ءوز بەتىنشە ءقاۋىپسىز جەرگە كوشە الماي جاتىر. ماماندار ولاردى ۇيلەردىڭ شاتىرىنا شىعىپ ەۆاكۋاتسيالاۋعا ءماجبۇر. ويتكەنى كوشەدەگى سۋدىڭ اعىسى قاتتى.

بالرام ميەنا، پوليسيا قىزمەتكەرى:

- قازىر ادامداردى قاۋىپسىز ورىندارعا كوشىرۋ وپەراتسياسى جالعاسىپ جاتىر. قالانىڭ ويپاتتى جەرلەرىندە ورنالاسقان اۋدانداردى سۋ باسىپ، كوپ قيىندىق تۋىنداپ وتىر. ءتىپتى ءبىزدىڭ پوليتسيا بولىمشەلەرى دە سۋ استىندا قالدى. فرانتسيانىڭ وڭتۇستىگىندە دە نوسەر سوڭى تاسقىنعا ۇلاسقان. گار دەپارتامەنتىندە ءقاۋىپتىڭ جوعارى دەڭگەيى جاريالاندى. كەيبىر اۋداندا نەبارى 6 ساعات ىشىندە جاۋىن- شاشىننىڭ 2 ايلىق مولشەرى تۇسكەن. 2 ادام ءىز- ءتۇزسىز جوعالىپ كەتكەن. سۋ باسقان كولىكتە سان جوق. جولداردا قوزعالىس شەكتەلگەن. پويىزدار دا توقتاپ تۇر.

تۇرعىندار قۇتقارۋشىلار كەلگەنشە كومەكتى ۇيلەردىڭ شاتىرىنا شىعىپ كۇتكەن. اۋا رايىنىڭ قولايسىزدىعىنا بايلانىستى دەپارتامەنتتەگى مەكتەپتەردىڭ بارلىعى ۋاقىتشا جۇمىس ىستەمەيدى. تەحاس شتاتىنداعى حيۋستون قالاسىندا دا مەكتەپتەر ۋاقىتشا جابىلدى. كوروناۆيرۋسقا قارسى ەكپە ورتالىقتارى دا جۇمىس ىستەمەي تۇر. ويتكەنى مۇندا نيكولاس تروپيكالىق داۋىلى ويران سالىپ جاتىر. مۇندا كۇشتى جەلمەن قاتار نوسەر جاۋعان. تەحاس پەن لۋيزيانا شتاتىندا 400 مىڭ ءۇي ەلەكتر قۋاتىنان اجىراتىلدى. جۋىردا عانا وسى لۋيزيانادا يدا داۋىلى ويران سالىپ، جاڭا ورلەان قالاسى بىرنەشە كۇنگە تولىقتاي جارىقسىز قالعان ەدى.

ماماندار جاقىن ارادا جەلدىڭ كۇشى باسەڭدەمەيتىنىن بولجاپ وتىر. نوسەردىڭ ءالى دە جالعاساتىن ءتۇرى بار. سونىڭ سالدارىنان سۋ باسۋ قاۋپى سەيىلمەي تۇر. جالپى ا ق ش- تا بيىل تابيعات اپاتىنان كەلتىرىلگەن ماتەريالدىق شىعىن 100 ميلليارد دوللاردان اسىپ كەتۋى ابدەن مۇمكىن. پرەزيدەنت دجو بايدەن بۇل رەكوردتىق كورسەتكىش دەيدى. ايتۋىنشا، كليماتتىڭ وزگەرۋى سالدارىنان جىل سايىن تابيعات اپاتتارى جيىلەپ بارادى.

دجو بايدەن، ا ق ش پرەزيدەنتى:

- كەيىنگى بىرنەشە ايدا ءار ءۇشىنشى امەريكا ازاماتى تابيعات اپاتىنان زارداپ شەككەن. ەلىمىزدىڭ شىعىسىندا نوسەر مەن داۋىلدار مازا بەرمەي جاتسا، باتىسىندا قۋاڭشىلىق پەن ورمان ءورتى تۇرعىنداردى ابىگەرگە سالدى.

بىلتىر تابيعات اپاتىنان كەلتىرىلگەن شىعىن 99 ميلليارد دوللارعا باعالانعان. بيىلعى كورسەتكىشتەر ودان اسىپ كەتەدى دەپ توپشىلاپ وتىرمىز. كورشى رەسەيدە نوسەر جاۋىپ، سانكت- پەتەربۋرگتە مەترو ستانتسياسىن سۋ باسقان.

قازىر قالاداعى ساياباقتاردىڭ ءبىرازى ۋاقىتشا جابىق تۇر. جاڭبىرمەن قوسا شاھاردا ەكپىندى جەل سوعىپ، ءبىراز قيىندىق تۋدىردى.

www.24.kz