ەلجان ءبىرتانوۆتىڭ ءۇي قاماق مەرزىمى ۇزارتىلدى

نۇر-سۇلتان. قازاقپارات - قازاقستاننىڭ بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ءۇي قاماقتا بولۋ مەرزىمى تاعى دا ۇزارتىلدى، دەپ حابارلايدى قازاقپارات.

«2021-جىلعى 14- قىركۇيەكتە نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى ەلجان ءبىرتانوۆتى ءۇي قاماققا الۋ مەرزىمىن قىلمىستىق ءىس ماتەريالدارىمەن تانىسۋ كەزەڭىندە ساعات 08:00 دەن 19:00 گە دەيىن تۇرعىن ۇيدەن شىعۋ قۇقىعىمەن 2021-جىلعى 14- قاراشاعا دەيىن ۇزارتۋدى قاۋلى ەتتى»، - دەلىنگەن نۇر-سۇلتان قالالىق سوتىنىڭ حابارلاماسىندا.

ايتا كەتسەك، نۇر-سۇلتان قالالىق سوتىنىڭ قىلمىستىق ىستەر جونىندەگى سوت القاسى ەلجان ءبىرتانوۆتى ءۇي قاماقتا ۇستاۋ بۇلتارتپاۋ شاراسىن بۇعان دەيىندە كۇشىندە قالدىرعان ەدى.

«باياندالعان دەرەكتەردىڭ نەگىزىندە، قىلمىستىق ءىس جۇرگىزۋ كودەكسىنىڭ 55، 56، 151، 152-باپتارىن باسشىلىققا الا وتىرىپ، سوت ەلجان امانتاي ۇلى ءبىرتانوۆقا قاتىستى ءۇي قاماق تۇرىندەگى بۇلتارتپاۋ شاراسىنىڭ مەرزىمىن 2021-جىلعى 14- ماۋسىمنان باستاپ 14- شىلدەنى قوسا العاندا ەسەپتەلەتىن 9 ايعا دەيىن ۇزارتۋ تۋرالى قاۋلى ەتتى. كۇدىكتىنىڭ قورعاۋشىلارى مەن ادۆوكاتتارىنىڭ وتىنىشتەرى قاناعاتتاندىرۋسىز قالدىرىلسىن»، - دەگەن بولاتىن تەرگەۋ سوتىنىڭ سۋدياسى اقمارال يسايەۆا.

ەسكە سالساق، وتكەن جىلى بۇرىنعى دەنساۋلىق ساقتاۋ ءمينيسترى ەلجان ءبىرتانوۆ قاماۋعا الىندى.

وعان قاتىستى اسا ءىرى كولەمدە بيۋجەت قاراجاتىن ىسىراپ ەتۋ فاكتىسى بويىنشا قىلمىستىق ءىستى تەرگەلىپ جاتىر.