چەحيا پرەزيدەنتى اۋرۋحاناعا جاتقىزىلدى

پراگا. قازاقپارات - چەحيا پرەزيدەنتى ميلوش زەمان بۇگىن، سەيسەنبىدە پراگانىڭ ورتالىق اسكەري اۋرۋحاناعا جاتقىزىلدى، دەپ حابارلايدى قازاقپارات Pravo گازەتىنە سىلتەمە جاساپ.

زەمان اۋرۋحاناعا جەرگىلىكتى ۋاقىت بويىنشا 11:00 دەن كەيىن جەتكىزىلدى. وعان جۇبايى يۆانا دا كەلدى.

گازەتتىڭ حابارلاۋىنشا، پرەزيدەنت اۋرۋحانادا ۇزاق جاتۋى مۇمكىن. 76 جاستاعى زەمان اياقتىڭ نەيروپاتياسىنان زارداپ شەگەدى. وسى اۋرۋدىڭ سالدارىنان ول جاقىندا مۇگەدەكتەر ارباسىنا كوشتى.

پرەزيدەنت ەستۋ قابىلەتىنىڭ ناشارلاعانىنا جانە قان قىسىمىنىڭ تومەندەگەنىنە شاعىمدانۋدا.

سونىمەن قاتار، ول بۇرىن قانت ديابەتى بويىنشا دارىگەرلەردىڭ باقىلاۋىندا بولعان. پراگاداعى ورتالىق اسكەري اۋرۋحانادا وتكەن دەمالىس كۇندەرىنەن باستاپ چەحيانىڭ بۇرىنعى پرەزيدەنتى ۆاتسلاۆ كلاۋس تا جاتىر.

ول قان قىسىمىنىڭ كۇرت كوتەرىلۋىنە بايلانىستى اۋرۋحاناعا تۇسكەن.