وسكەمەن- التاي تاسجولىنداعى جوندەۋ جۇمىستارى تىم باياۋ - دانيال احمەتوۆ

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ «وسكەمەن- التاي» تاسجولىنداعى جوندەۋ جۇمىستارىنىڭ تىم ۇزاققا سوزىلىپ كەتكەندىگىن ايتتى، دەپ حابارلايدى قازاقپارات ءتىلشىسى.

ايماق باسشىسى جولاۋشىلار كولىگى جانە اۆتوموبيل جولدارى باسقارماسى جانە «قازاق اۆتوجول» ج ش س وكىلدەرىمەن كەڭەس وتكىزدى. قازىر وڭىردە رەسپۋبليكالىق جانە وبلىستىق ماڭىزى بار جولداردى جوندەۋ جانە رەكونسترۋكسيالاۋ ءۇشىن ءبىرقاتار جوبا ىسكە اسىرىلىپ جاتىر.

«وسى جۇمىستاردىڭ تيىمدىلىگى مەن ساپاسىن باعالاۋ وتە ماڭىزدى. 2022 -جىلعا جانە ودان كەيىنگى جىلدارعا ارنالعان جوبالاردى دايىنداۋ قاجەت. «وسكەمەن- التاي» تاسجولىنىڭ وكتيابرسكي اۋىلىنان كەيىنگى ۋچاسكەسىندە جوندەۋ جۇمىستارى تىم باياۋ جۇرگىزىلىپ جاتىر. جازدا وبلىسقا اۆتوكولىكپەن كەلگەن تۋريستەر جول ازابىن تارتتى. بۇلاي سوزۋعا بولمايدى. مەن «قازاق اۆتوجول» كاسىپورنىنا ناقتى جۇمىس كەستەسىن ازىرلەۋدى تاپسىردىم»، - دەدى دانيال احمەتوۆ.

ونىڭ ايتۋىنشا، زايسان اۋدانىنا اپاراتىن رەسپۋبليكالىق تاسجولدىڭ جۇمىسىنا قاتىستى قىتايلىق مەردىگەر كومپانيا مەن قازاقستاندىق قوسالقى مەردىگەر كومپانيا اراسىنداعى داۋلاردى شەشۋ قاجەت. «وسينوۆ اسۋىن» اينالىپ وتەتىن جول قۇرىلىسىنىڭ ماسەلەسىنە كەلەتىن بولساق، بۇل رەسپۋبليكالىق جوبا. بۇعان مۇمكىندىگىنشە تەزىرەك جاڭا تەندەر جاريالاۋ كەرەك. ق ر يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى مالىمدەگەندەي، جوباعا تۇزەتۋ ەنگىزىلگەن. جول قۇرىلىسى جۇمىستارىن اياقتاۋعا 12 ميلليارد تەڭگە ءبولىندى. كونكۋرس جاريالانىپ، ونىڭ قورىتىندىسى بويىنشا مەردىگەر انىقتالۋى ءتيىس»، - دەدى وبلىس اكىمى.

كەلەسى جىلى كاتونقاراعاي اۋدانىندا ءتورت اعاش كوپىردى تەمىر بەتون كوپىرگە اۋىستىرۋ جۇمىستارى باستالماق. ءۇش جىل بۇرىنعى جوبالارعا ءبىرقاتار تۇزەتۋ ەنگىزىلەدى.

«ومبى - مايقاپشاعاي» تاسجولىن، قاينار اۋىلىنا اپاراتىن جولدى، «اقسۋات - اياگوز» جانە «اۋەزوۆ - شار» ۋچاسكەلەرىندەگى جوندەۋ جۇمىستارىن اياقتاۋ كەزەك كۇتتىرمەيتىن ماسەلە. بىزگە الدا اتقارىلۋى ءتيىس جوبالاردى جوسپارلاۋ ءۇشىن ناقتى جۇمىس كەستەسى قاجەت. ەڭ الدىمەن ايماقتىڭ بەلگىلى ءبىر اۆتوموبيل جولدارىنداعى قوزعالىس قارقىندىلىعىن ەسكەرۋ كەرەك»، - دەدى دانيال احمەتوۆ.

اۆتور: تالعاتجان مۇحامەتبەك ۇلى