قاتونقاراعاي اۋدانىنداعى وبالاردىڭ ەرتە تەمىر داۋىرىنە جاتاتىنى انىقتالدى

وسكەمەن. قازاقپارات - شىعىس قازاقستان وبلىسىنىڭ قاتونقاراعاي اۋدانى اققاينار اۋىلىنىڭ جانىندا ورنالاسقان شۋ قورىمىن زەرتتەۋ بارىسىندا ءار ءتۇرلى جەر ءۇستى قۇرىلىسى بار ەلۋدەن اسا جەرلەۋ عۇرىپتىق ەسكەرتكىشتەرى شوعىرلانعانى انىقتالدى، دەپ حابارلايدى قازاقپارات «بەرەل» مەملەكەتتىك تاريحي- مادەني قورىق- مۋزەيىنىڭ باسپا ءسوز قىزمەتىنە سىلتەمە جاساپ.

ارحەولوگتاردىڭ ايتۋىنشا، وبالار ەرتە تەمىر ءداۋىرىنىڭ ەرتە كەزەڭىنە جاتادى. مۇنداي بولجام جاساۋعا وباداعى جەرلەۋ عۇرپى نەگىز بولعان. وبانىڭ قابىر شۇڭقىرىندا ەكى كىسىنىڭ ءمايىتى قويىلعان، ءبىرىنشىسى - قارۋ جاراق اسىنعان ءىرى دەنەلى ەر ادام. قارۋلاردىڭ ىشىندە قولا قانجار جانە قولادان جاسالعان ايبالتا بار. سونىمەن قاتار جەبە سالاتىن قورامساق تابىلدى، ونىڭ بەلدىككە ىلەتىن قولا ىلمەگى بار. جەبەسىنىڭ ۇشى سۇيەكتەن جاسالعان. ال، قالعاندارى قولا.

مامانداردىڭ ايتۋىنشا، قارۋلار شايقاسقا ارنالماعان، سەبەبى كىشكەنە ەتىپ جاسالعان. ەكىنشى ءمايىت ەر ادامنان كەيىن جەرلەنگەن. ونىڭ سۇيەگى كىشىلەۋ، جامباس تۇسىنا تەرى ءۇستى توقىلعان قالتاعا سالىنعان قولا اينا قويىلعان. مايىتتەرمەن بىرگە قىش ىدىستار جانە قويدىڭ قۇيىمشاق سۇيەگى قويىلعان. قىش ىدىستاردىڭ ەرنەۋىندە ورنەكتەرى بار. ايتا كەتەرلىگى، اققاينار اۋىلىندا جۇرگىزىلىپ جاتقان ارحەولوگيالىق قازبا جۇمىستارىنىڭ جەتەكشىسى بەلگىلى ارحەولوگ زەينوللا ساماشيەۆ.