ا ق ش- قا سۇراپىل داۋىل جاقىنداپ قالدى، لۋيزيانادا توتەنشە جاعداي جاريالاندى

نۇر-سۇلتان. قازاقپارات - مەكسيكا بۇعازىمەن جىلجىعان «نيكولاس» تروپيكالىق داۋىلى ا ق ش جاعالاۋىنا جاقىنداپ قالدى، دەپ حابارلايدى قازاقپارات Reuters-كە سىلتەمە جاساپ.

امەريكا ۇلتتىق داۋىل ورتالىعىنىڭ (NHC) مالىمەتىنشە، داۋىل ەپيتسەنترىندەگى جەلدىڭ ەكپىنى ساعاتىنا 65 شاقىرىمعا جەتەدى.

سۇراپىل داۋىل مەكسيكا بۇعازىنداعى كورپۋس-كريستي جانە گالۆەستون قالالارىنىڭ اراسىمەن وتەدى دەپ كۇتىلۋدە.

الايدا، NHC بولجامى بويىنشا «نيكولاس» سالدارىنان حيۋستون مەن وعان جاقىن اۋدانداردا كەنەتتەن سۋ تاسقىنى بولۋى مۇمكىن. شتاتتىڭ ءبىرقاتار اۋداندارىنا داۋىلدىڭ جاقىنداپ كەلە جاتقانى تۋرالى ەسكەرتۋ بەرىلدى.

لۋيزيانا شتاتىنىڭ گۋبەرناتورى دجون بەل ەدۆاردس شتاتتا توتەنشە جاعداي جاريالادى.

سەبەبى، لۋيزيانا ەكى اپتا بۇرىن «يدا» داۋىلى مەن سۋ تاسقىنىنان كەيىن ەندى قالىپقا كەلىپ جاتىر.