اۋعانستانداعى «تاليبان» جۇيەسى: ايەلدەر ەر ادامدارمەن بىرگە وقىمايدى
جەكسەنبى، 12- قىركۇيەك كۇنى «تاليبان» قوزعالىسىنىڭ باسشىلىعى اۋعانستاننىڭ ءبىلىم بەرۋ جۇيەسىندەگى جاڭا ەرەجەلەر تۋرالى مالىمدەدى. جاڭادان قۇرىلعان ۇكىمەتتىڭ جوعارى ءبىلىم ءمينيسترى ابدۋل باكي حاككاني ەندى ايەلدەر ەر ادامدارمەن بىرگە وقىمايتىنىن ءمالىم ەتتى.
حاككاني مالىمدەمەسى جاسالعان كۇنى كابۋل قالاسىندا ءۇش جۇزدەن استام اۋعاندىق ايەل كابۋل ۋنيۆەرسيتەتىنىڭ امفيتەاترىندا جينالىپ، «تاليباننىڭ» گەندەرلىك ساياساتىنا قولداۋىن ءبىلدىرۋ ءۇشىن شەرۋگە شىققان. ولاردىڭ كوبى قارا نيكاب كيىپ، قولدارىنا تالىبتەردىڭ اق تۋلارىن ۇستاعان. اكسياعا قاتىسۋشى ايەلدەر قولدارىنا «اۋعانستاننان كەتكەن ايەلدەر ءبىزدىڭ اتىمىزدان سويلەي المايدى» جانە «ءبىز مودجاحەدتەردىڭ «تاليباننىڭ») قاتىناسى مەن تارتىبىنە قاناعاتتانىپ وتىرمىز» دەپ جازىلعان پلاكاتتاردى ۇستاپ، قالا كوشەلەرىمەن ءجۇرىپ ءوتتى.
بۇگىندە ەنگىزىلگەن جاڭا ەرەجەلەر ەندى اۋعانستان ايەلدەرىنە جوعارى ءبىلىم الۋعا رۇقسات بەرمەيدى دەگەن پىكىرلەر ايتىلۋدا، سەبەبى ەلدىڭ جوعارى وقۋ ورىندارىندا ايەلدەر مەن ەر ادامداردىڭ بولەك سىنىپتارىن ۇيىمداستىرۋ ءۇشىن رەسۋرستار جوق. بۇعان حاككاني ايەل مۇعالىمدەردىڭ جەتكىلىكتى ەكەنىن، ال رەسۋرستار بولماعان جەردە بالاماسى تابىلاتىنىن ايتىپ جاۋاپ بەردى.
«بارلىعى ۋنيۆەرسيتەت مۇمكىندىكتەرىنە بايلانىستى»، - دەدى ول. «ءبىز سونداي- اق شىمىلدىق ارتىندا وقىتاتىن ەر ادام مۇعالىمدەردى تارتامىز، نەمەسە تەحنولوگيالاردى قولدانامىز»، - دەپ قوستى. بۇگىن اۋعانستان مەكتەپتەرىنىڭ باستاۋىش جانە ورتا سىنىپتارىندا ەر بالالار مەن قىزدار بولەك وقىتىلادى.
اۆتور: زارينا تۋعانبايەۆا
