كوروناۆيرۋستىڭ تارالۋى نەگە بىردە ءورشىپ، بىردە باياۋلايدى - دارىگەر جاۋابى
ونىڭ ايتۋىنشا، شەكتەۋ شارالارىن ساقتاعان كەزدە اۋرۋ جۇقتىرۋ كورسەتكىشى ايتارلىقتاي تومەندەيدى. «الەۋمەتتىك اراقاشىقتىقتى ساقتاۋ، ماسكا تاعۋ، لوكداۋن جاريالاعاندا ۆيرۋستىڭ تارالۋى تومەندەگەنىن كوردىك. كەيىن كارانتين تالاپتارىن جەڭىلدەتكەندە ۆيرۋستىڭ تارالۋى قايتا ءورشي تۇسەدى. الەۋمەتتىك قاشىقتىقتى ساقتاعان سايىن ناۋقاستار سانى ازايادى. تامىز ايىنان باستاپ ۆيرۋس جۇقتىرۋشىلار سانى تومەندەدى، بۇل ۆاكسينا الۋشىلار سانىنىڭ ارتۋىمەن بايلانىستى»، - دەيدى ول.
سونىمەن قاتار ول اۋرۋحاناعا اۋىر حالدە تۇسەتىن ناۋقاستار سانى نەلىكتەن ارتقانىن ايتتى. «كوروناۆيرۋس اۋرۋىنىڭ بەلگىلەرى بىلتىردان بەرى ءبىرقالىپتى وتۋدە. سوعان بايلانىستى ناۋقاستار ۇيدە ءوز بەتىنشە ەمدەلە باستادى. ونىڭ ارتى ادام دەنساۋلىعىنىڭ ناشارلاۋىنا اكەپ جاتىر. ءوز بەتىنشە ەمدەلگەن دۇرىس ەمەس، قاندايدا ءبىر اۋرۋ بەلگىسى بىلىنسە ۋاقىت وزدىرماي دارىگەرگە قارالۋ كەرەك. كوروناۆيرۋستىڭ بەلگىسى ول تۇشكىرۋ، مۇرىن بىتەلۋى، جوتەل، دەنە قىزۋىنىڭ كوتەرىلۋى، بۋىنداردىڭ سىرقىراۋى جانە تاعى باسقالارى. بۇل بەلگىلەر ج ر ۆ ي مەن تۇماۋعا دا ءتان. ولاردى اجىراتۋ ءۇشىن ءبىرىنشى كەزەكتە دارىگەرگە حابارلاسۋ قاجەت. تاجىريبە كورسەتكەندەي قازىر بۇل اۋرۋ بەلگىلەرىنە ىشەك ينفەكسياسى قوسىلدى»، - دەيدى دينارا ماحانبەتقۇلوۆا.
سپيكەر يممۋنيتەتى تومەن ادامدار كوروناۆيرۋستى جۇقتىرۋعا بەيىم كەلەتىنىن تىلگە تيەك ەتتى. «يممۋنيتەتى تومەن جانە سوزىلمالى اۋرۋى بار ادامدار ءجيى اۋىرادى. ول ەرەسەك نەمەسە ورتا بۋىن وكىلدەرى بولۋى مۇمكىن، ەگەر ادامنىڭ يممۋنيتەتى تومەن بولسا، ول جەردە جاس ەرەكشەلىگى ماڭىزدى ەمەس. ويتكەنى قازىر بالالار دا اۋىرىپ جاتىر»، - دەدى ول.
اۆتور: الما مۇقانوۆا
