وتباسى كۇنى: ش ق و-داعى تۇرمەدە ەرەكشە اكسيا ءوتتى
ش ق و ق ا ج دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وتباسى كۇنىنە وراي و ۆ 156/6 قاۋىپسىزدىگى جوعارعى مەكەمەسىندە اكسيا ءوتتى.
سونىڭ اياسىندا جازاسىن وتەۋشىلەر تاكسوفون، حات جازۋ، بەينەقوڭىراۋ ارقىلى ءوز جانۇيالارىمەن حابارلاستى. مىسالى، 12 جىلعا باس بوستاندىعىنان ايىرىلعان دميتري مەكەمە اكىمشىلىگىنە وتباسىمەن Skype ارقىلى سويلەسۋگە ءوتىنىش بىلدىرگەن. پاۆلودار قالاسىندا تۇراتىن اناسى جانە قارىنداسىمەن بەينەقوڭىراۋ ارقىلى بايلانىسقا شىققان ول «مەن سىزدەردى قاتتى ساعىندىم. وتباسى كۇنى قۇتتى بولسىن! ەشقاشان اۋىرماڭىزدار» دەپ جاقىندارىمەن قاۋىشقىسى كەلىپ جۇرگەنىن ايتتى. جازاسىن وتەۋشى قانات جولدىبايەۆ كوپبالالى اكە. بالالارىنا حات ارقىلى ىشكى جان دۇنيەسىن اقتارعان قانات «اينالايىن جاندارىم، قالدارىڭ قالاي؟ ساباقتارىڭ جاقسى ما؟ سەندەردى قاتتى جاقسى كورەمىن! بوستاندىققا شىعاتىن كۇنىمدى تاعاتسىزدانا كۇتىپ ءجۇرمىن» دەپ جازدى.
«سوتتالعاندار ىشىندە وتباسى جوقتارى دا جەتەرلىك. مۇنداي ادامدارعا الەۋمەتتىك-قۇقىقتىق كومەك كورسەتىلىپ تۇرادى. جازاسىن وتەپ بولعاننان كەيىن ولار الەۋمەتتىك بەيىمدەۋ ورتالىقتارىنا ورنالاستىرىلادى»، - دەدى مەكەمە باستىعى قۋانىشبەك اعىسبايەۆ.
اۆتور: تالعاتجان مۇحامەتبەك ۇلى
