11:51, 13 - قىركۇيەك 2021 | GMT +5
فەمينيستەر ەڭ ۇزدىك فۋتبولشى رونالدۋعا قارسى اكسيا وتكىزدى
نۇر-سۇلتان. قازاقپارات – Level Up فەمينيستىك ۇيىمى «مانچەستەر يۋنايتەد» شابۋىلشىسى كريشتيانۋ رونالدۋعا قارسى اكسيا وتكىزدى، - دەپ حابارلايدى Gazeta باسىلىمى.
«ولد تراففورد» ستاديونىندا وتكەن انگليا چەمپيوناتىنىڭ «نيۋكاسل يۋنايتەدكە» قارسى ءتورتىنشى تۋرىنىڭ كەزدەسۋى كەزىندە مودەل كەترين مايورگيدى قولداۋ ءۇشىن ارەنانىڭ ۇستىنەن ۇشاقپەن باننەر ۇشىپ ءوتتى.
وسىلايشا فەمينيستەر رونالدۋدى 2009 -جىلى زورلادى دەپ ايىپتاعان قىزدىڭ ىسىنە نازار اۋدارعىسى كەلدى.
2018 -جىلى مايورگا پورتۋگاليا قۇراماسىنىڭ شابۋىلشىسىن زورلادى دەپ ايىپتاعان بولاتىن. ونىڭ ايتۋىنشا، وقيعا 2009 -جىلى لاس-ۆەگاستا بولعان. مودەل فۋتبولشىنىڭ وكىلدەرى وعان اقپاراتتى جاريالاماۋى ءۇشىن 375 مىڭ دوللار تولەگەنىن ايتتى.
2020 -جىلدىڭ قازانىندا قىز قايتا سوت ءىسىن اشپاق بولدى. ول 2010 -جىلى اقپارات جاريالاماۋ تۋرالى كەلىسىمشارتتى تۇسىنە الماعانىن ايتتى.
ال رونالدۋ وقيعانى ءۇزىلدى-كەسىلدى جوققا شىعارىپ وتىر.
