پاۆلودار وبلىسىندا مال ۇرلايتىن ۇيىمداسقان قىلمىستىق توپ ۇستالدى
«پاۆلودار وبلىسىنىڭ اۋماعىندا قۇرامىنا 10 ادام كىرگەن ۇيىمداسقان قىلمىستىق توپ ۇستالدى. توپ مۇشەلەرىنىڭ ءوز رولدەرى بولعان: ءوز بارىمتاشىلارى، ساتۋشىلارى، قاجەتتى قۇجاتتاردى جيناۋمەن اينالىساتىندار، سونداي- اق مال دارىگەرلەر بولعان. قىلمىستىق توپ مال ۇرلاپ، ونى سويىپ ساتۋمەن اينالىسقان»، - دەدى پاۆلودار وبلىستىق پوليتسيا دەپارتامەنتىنىڭ باستىعى نۇرلان ءماسىموۆ.
«كۇدىكتىلەر ەكىباستۇز قالاسىندا ۇرلىق ۇستىندە ۇستالدى. «ۆاز 21099» اۆتوكولىگىن تەكسەرۋ كەزىندە ءبىر سيىر ەتى، مەتالل ەلەكتروندىق تارازى تاركىلەندى، ال «Audi» كولىگىنەن ۆەتەرينارلىق انىقتاما تابىلدى»، - دەدى پوليتسيا دەپارتامەنتىنەن.
«قاسكۇنەم مىناداي سحەمامەن جۇمىس ىستەگەن: اپتاسىنا ءبىر رەت دەمالىسقا قاراي ەكىباستۇزداعى ءىرى شارۋا قوجالىعىنان 2 باس ءىرى قارا مال ۇرلاپ، دەمالىس كۇندەرى قالا بازارلارىندا جانە ۇيىندە سويىپ ساتىپ وتىرعان. كۇدىكتىلەر بۇعان دەيىن ەت ونىمدەرىن ساتۋمەن اينالىسقان، تۇراقتى كليەنتتەرى بار. سوندىقتان، قالا تۇرعىندارى ودان كۇدىكتەنبەگەن»، - دەدى نۇرلان ءماسىموۆ.
قۇقىق قورعاۋ ورگاندارى سوتقا دەيىنگى تەرگەۋدى باستادى. پوليتسەيلەردىڭ ايتۋىنشا، ۇستالۋشىلار ەكىباستۇز قالالىق ۋاقىتشا ۇستاۋ وقشاۋلاعىشىنا قامالدى. سوتقا دەيىنگى تەرگەۋ بارىسىندا كۇدىكتىلەردىڭ باسقا دا وسى سىندى قىلمىستارعا قاتىسىنىڭ بار- جوعى انىقتالىپ جاتىر.
