اۋعانستاننىڭ ۇلت ازاتتىق كۇشتەرى تالىپتەردى پاندجشەردەگى ءۇش اۋداننان ىعىستىردى

كاير. تاسس- قازاقپارات - ۇلت ازاتتىق فرونتىنىڭ (ۇ ف) جاساعى سولتۇستىكتەگى پاندجشەر پروۆينتسياسىندا راديكالداردان ءۇش اۋداندى جاۋلاپ الدى.

بۇل پرۆينسيا اۋعانستاندى جاۋلاپ العان «تاليبان» راديكالدى قوزعالىسىنا باعىنعان جوق. بۇل تۋرالى جۇما كۇنى Afghanistan Times جەرگىلىكتى گازەتى جازدى.

تالىپتەرگە قارسىلىق كورسەتىپ جاتقان جاساق پاندجشەردىڭ سولتۇستىك جانە سولتۇستىك- شىعىسىندا ورنالاسقان دارا، ابشار جانە پاريان اۋداندارىن ءوز باقىلاۋىنا قايتارىپ الدى. ۇ ق ك ف كۇشتەرى جويقىن سوعىس ناتيجەسىندە ونداعان ءتالىپ سودىرىنىڭ كوزىن جويعان.

«تاليبان» قوزعالىسى كوكتەمدە ا ق ش قارۋلى كۇشتەرى ءوز اسكەرىن اۋعانستاننان الىپ كەتۋ تۋرالى شەشىم قابىلداعاننان كەيىن ەلدەگى بيلىكتى ءوز قولىنا الۋ ءۇشىن اۋقىمدى وپەراتسيا جۇرگىزدى. 15 - تامىزدا اۋعانستان پرەزيدەنتى اشراف گاني وكىلەتتىگىنەن باس تارتىپ، ەلدەن كەتتى. تالىپتەر سوعىسسىز كابۋلدى باسىپ الدى. احماد ماسۋد باستاعان راديكالداردىڭ بيلىگىنە قارسى توپ پاندجشەردە قارسىلىق كورسەتتى. ونى ءوزىن مەملەكەت باسشىسىنىڭ مىندەتىن اتقارۋشى ەتىپ جاريالاعان ەلدىڭ بۇرىنعى ۆيتسە- پرەزيدەنتى امرۋللا سالەح قولداۋعا شاقىردى.

دۇيسەنبى كۇنى تالىپتەردىڭ وكىلى زابيحۋللا مۋدجاحيد پاندجشەردىڭ تولىقتاي «تاليبان» باقىلاۋىنا وتكەنىن، سوندىقتان اۋعانستان اۋماعىندا سوعىس توقتاعانىن جاريالادى. ءوز كەزەگىندە ماسۋد راديكالدارعا قارسىلىق جالعاسىپ جاتقانىن ءمالىم ەتىپ، اۋعانستاننىڭ بارلىق تۇرعىنىن جالپى ۇلتتىق كوتەرىلىسكە شاقىردى. قارسىلىق كورسەتۋشىلەر توبىنىڭ وكىلى الي مايسام نازاري قارسىلىقتىڭ پارتيزان سوعىسى تاسىلىنە كوشىپ جاتقانىن ناقتىلادى. كەيىننەن پاندجشەردەگى ت ا س س دەرەككوزى بۇل وڭىردە سۇراپىل سوعىس جالعاسىپ جاتقانىن حابارلادى. پروۆينتسيا تۇرعىندارىنىڭ باسىم بولىگى تالىپتەردىڭ ارەكەتىنەن ءوز ۇيلەرىن تاستاپ، تاۋعا قاراي كەتىپ جاتىر.

اۆتور: اقبوپە ءابدراسۋل