ەكىنشى وتاندىق ۆاكسينانىڭ كلينيكالىق زەرتتەۋى قالاي ءوتىپ جاتىر؟

نۇر-سۇلتان. قازاقپارات - جامبىل وبلىسى اكىمدىگى دەنساۋلىق ساقتاۋ باسقارماسى باسشىسىنىڭ ورىنباسارى حاميت مىرزاقاسىموۆ تاراز قالاسىنداعى كوپبەيىندى اۋرۋحانادا ەكىنشى قازاقستاندىق ۆاكسينانىڭ قالاي زەرتتەلىپ جاتقانىن ايتتى، دەپ حابارلايدى قازاقپارات ءتىلشىسى.

«وتاندىق ەكىنشى سۋببىرلىكتى ۆاكسينا بويىنشا ايتساق، كلينيكالىق سىناقتىڭ ءبىرىنشى كەزەڭىندە زەرتتەۋدەن 44 ادام ءوتتى. ەندى ەكىنشى كەزەڭگە 200 ادام جيناقتالىپ جاتىر. قازىرگى تاڭدا 130 ادام تالداۋلاردىڭ بارىنەن تەكسەرىلىپ، ۆاكسينا سالىندى. قالعان 70 ادامدى زەرتتەپ جاتىرمىز. زەرتتەۋدەن دۇرىس وتكەن جاعدايدا ەرىكتىلەرگە دە ۆاكسينا ەگەمىز»، - دەدى باسقارما وكىلى.

ونىڭ ايتۋىنا قاراعاندا، جاڭا ۆاكسينانىڭ كلينيكالىق زەرتتەۋىنە ەرىكتىلەر اۋدانداردان دا تارتىلعان.

«باسقا اۋدانداردان ەرىكتى ادامدار اكەلگەنىمىز راس. قورداي جانە باسقا اۋدانداردان كەلدى. ولار تارازداعى كوپبەيىندى اۋرۋحانانىڭ بازاسىندا عانا تەكسەرىلەدى. سول بازانىڭ وزىندە زەرتحانا بار. تەكسەرۋلەردىڭ ءبارى سوندا وتكىزىلەدى. ول 6 ايعا دەيىن سوزىلادى. ەرىكتىلەردىڭ ءوز كەلىسىمى بويىنشا 6 ايدىڭ ىشىندە ولار كەستەگە سايكەس تالداۋ تاپسىرۋعا جانە قاداعالاۋعا كەلىپ تۇرادى»، - دەدى حاميت مىرزاقاسىموۆ.