قاراعاندى حايۋاناتتار باعى ءمۇيىزى كەسىلىپ، قانسىراپ جاتقان بۇعىلارعا قاتىستى تۇسىنىك بەردى

قاراعاندى. قازاقپارات - قاراعاندى حايۋاناتتار باعىنىڭ باسشىلىعى الەۋمەتتىك جەلى قولدانۋشىلارىنىڭ نارازىلىعىن تۋدىرعان جاعدايدى ءتۇسىندىردى.

تانىمال پابليكتەردىڭ جازىلۋشىلارى ۆيدەودا مۇيىزدەرى كەسىلىپ، قانعا ورانىپ جاتقان بۇعىلاردى كورىپ، اشۋلى پىكىرلەرىن جازعان. بۇگىن حايۋاناتتار باعىنىڭ باسشىلارى بۇل ماسەلەگە قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

كەشە، 9 - قىركۇيەكتە قاراعاندىنىڭ تانىمال پابليكتەرىنىڭ پاراقشالارىندا فوتوسۋرەتتەر مەن ۆيدەولار پايدا بولدى. وندا ءمۇيىزى كەسىلگەن، باسىنان قانى اعىپ جاتقان بۇعىلاردى كورۋگە بولادى. بۇل ۆيدەو قاراعاندىلىقتاردىڭ نارازىلىعىن تۋدىردى. الايدا جەل پايدالانۋشىلارىن ودان بۇرىن جانۋارلاردىڭ جاعدايى الاڭداتىپ وتىر. حايۋاناتتار باعىنىڭ باسشىلىعى تۇسىندىرگەندەي، جانۋارلاردىڭ ومىرىنە قاۋىپ تونەردەي ەشقانداي جايت بولماعان - مۇنداي پروتسەدۋرا جىل سايىن وتكىزىلەدى جانە ونىڭ الدىندا جانۋارلارعا ارنايى ءقاۋىپسىز پرەپارات ەگىلىپ، قوزعالىسى شەكتەلەدى.

«مەن حايۋاناتتار باعىندا شامامەن 12 جىلدان بەرى جۇمىس ىستەپ كەلەم جانە ءبىز ءارقاشان جانۋارلاردىڭ ءمۇيىزىن بىردەي ادىسپەن كەسىپ تاستايمىز. بۇعى - وتە جابايى اڭدار. جىل سايىن ءبىز ەركەك بۇعىلاردىڭ ءمۇيىزىن كەسەمىز، ويتكەنى ولار اگرەسسيۆتى بولادى. قازىر اڭداردا تابيعي جۇپتاسۋ كەزەڭى باستالدى، ولاردى ءبىر- بىرىنەن قورعاۋ جانە حايۋاناتتار باعىنىڭ قىزمەتكەرلەرىنىڭ قاۋىپسىزدىگى ءۇشىن ءمۇيىز كەسۋ شارالارى ءجۇرىپ جاتىر. كەشە ولار پروتسەدۋرادان كەيىن بىردەن ۆيدەوعا ءتۇسىرىلدى، جانۋار قالپىنا كەلۋى ءۇشىن شامامەن 2 ساعات ۋاقىت قاجەت. بۇل جاعدايدا مۇيىزدەر دەرەۋ ارنايى ەرىتىندىمەن وڭدەلدى. ولاردى وراۋعا بولمايدى، ودان پايدا جوق. ولار مۇيىزدەرىن ۇنەمى ۇرىپ- سوعىپ، دۋالعا قاجاپ، كەز كەلگەن تاڭعىشتى الىپ تاستايدى.

تابيعاتتا بۇعى كوكتەمدە مۇيىزدەرىن تاستايدى، ءبىراق وعان دەيىن ولار ۇنەمى ۇرعاشى بۇعى ءۇشىن كۇرەسەدى. ولار ءتىپتى ءبىر- ءبىرىن ولتىرۋگە دەيىن بارادى. ۇرىستا جەڭىلگەن بۇعى كەتۋى كەرەك. ءبىراق ولار حايۋاناتتار باعىندا، باراتىن جەرى جوق. سوندىقتان جانۋارلار اراسىنداعى قاقتىعىس قايتالانا بەرەدى. بۇعان جول بەرمەس ءۇشىن ءبىز مۇيىزدەردى ەرتەرەك الىپ تاستايمىز. بۇگىن سىزدەر جانۋارلاردىڭ جاعدايى جاقسى ەكەنىن كورىپ وتىرسىزدار. ولار جۇگىرىپ، ويناپ ءجۇر. بۇل - مىندەتتى ۆەتەرينارلىق شارا، ونى بارلىق حايۋاناتتار باعىندا وتكىزەدى»، - دەپ ءتۇسىندىردى حايۋاناتتار باعىنىڭ قىزمەتكەرى امين الين.

حايۋاناتتار باعىنىڭ ديرەكتورى گۇلنار ادامبەكوۆا دا كەلۋشىلەر حايۋاناتتار باعىنا قاتىستى نەگە تەرىس پىكىر ايتاتىنىن تۇسىنبەيمىن دەيدى. ونىڭ ايتۋىنشا، سوڭعى جىلدارى حايۋاناتتار باعى ايتارلىقتاي وزگەرىپ، جانۋارلاردىڭ جاعدايى جاقساردى. ونىڭ ايتۋىنشا، بۇگىندە حايۋاناتتار باعىندا 10 جىلدان 30 جىلعا دەيىنگى ەڭبەك ءوتىلى بار قىزمەتكەرلەر جۇمىس ىستەيدى. ولاردىڭ بارلىعى كەرەمەت ماماندار جانە ولاردىڭ ەشقايسىسى جانۋارلارعا جاماندىق تىلەمەيدى، كەرىسىنشە، ولار اڭداردىڭ ءومىر ءسۇرۋ جاعدايىن جاقسارتۋعا تىرىسادى.

«ءبىز جانۋارلاردىڭ ءومىرىن جاقسارتۋعا تىرىسامىز. ءبىزدىڭ تۇراقتى قوناقتارىمىز ساياباقتىڭ قالاي وزگەرگەنى، قانشالىقتى جايلى بولعاندىعى تۋرالى بىرنەشە رەت ايتىپ كەتتى. ءبىزدىڭ قىزمەتكەرلەر بۇل جانۋارلاردى جاقسى كورەدى جانە ولارعا زيان تيگىزگىسى كەلمەيدى. جاڭا جاعدايلاردىڭ ارقاسىندا بيىل بىزدە بىرنەشە جىلدان كەيىن العاش رەت بيزون تولدەدى. بۇل - حايۋاناتتار باعى ءۇشىن كەرەمەت وقيعا»، - دەيدى گۇلنار ادامبەكوۆا.

اۆتور: اگاتا مۋحامەدجانوۆا