مەرەيلى وتباسى مەملەكەتتىك بايقاۋىنىڭ جەڭىمپازدارى انىقتالدى

نۇر-سۇلتان. قازاقپارات - وتباسى كۇنى قارساڭىندا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆتىڭ قاتىسۋىمەن ونلاين فورماتتا «مەرەيلى وتباسى» ۇلتتىق كونكۋرسىنىڭ لاۋرەاتتارىن ماراپاتتاۋ ءراسىمى ءوتتى، دەپ حابارلايدى قازاقپارات.

مەملەكەتتىك حاتشى ءراسىمدى اشا وتىرىپ مەملەكەت باسشىسى قاسىم-جومارت توقايەۆتىڭ قۇتتىقتاۋىن وقىدى، وندا كونكۋرستىڭ وسكەلەڭ ۇرپاقتى تاربيەلەۋدەگى جانە وتباسىلىق قۇندىلىقتاردى نىعايتۋداعى ماڭىزدىلىعى اتاپ وتىلگەن.

بيىل كونكۋرس وتكىزۋدىڭ جاڭا تاسىلدەرى ەنگىزىلدى، وعان سايكەس ەندى جىل سايىن رەسپۋبليكا بويىنشا 17 ۇزدىك وتباسى انىقتالاتىن بولادى. جالپى اعىمداعى جىلى وڭىرلىك كونكۋرستىق كوميسسيالارعا بارلىعى 2768 ءوتىنىم بەرىلدى (%68,7 اۋىلدىق وتباسىلار، %31,3 قالالىق وتباسىلار).

جاڭا ەرەجەلەرگە سايكەس وتىنىمدەر تەك وتباسىلاردان عانا ەمەس، زاڭدى تۇلعالاردان دا قابىلداندى. ماراپاتتاۋ ءراسىمى بارىسىندا لاۋرەات وتباسىلار ءوز اسەرلەرىمەن ءبولىستى.

وسىلايشا، اقمولا وبلىسىنىڭ كوپ بالالى قانداس- وتباسىنىڭ باسشىسى قۇرمەت نۇرسۇلتان ەلباسى مەن پرەزيدەنت قاسىم- جومارت توقايەۆتقا قانداستارىمىزدى قولداعانى جانە پەداگوگتاردىڭ مارتەبەسىن كوتەرگەنى ءۇشىن العىس ايتتى. سقو جەڭىمپازى كرەيدۋن وتباسى - بەس بالانى اسىراپ الىپ، تاربيەلەپ وتىرعان ۇيلەسىمدى جانە تاتۋ وتباسىنىڭ ۇلگىسى.

يننا كرەيدۋن ونىڭ وتباسى باسقا دا كوپتەگەن ادامدار سياقتى قازاقستانداعى اۋىلداردىڭ وركەندەۋى مەن دامۋى ءۇشىن بارلىق كۇش- جىگەرىن سالاتىنىن اتاپ ءوتتى. الماتى قالاسىنىڭ دارىگەرلەر اۋلەتىنىڭ وكىلى، «استانا ەكولايف» ە ك ۇ مەديتسينالىق ورتالىعىنىڭ باس ديرەكتورى احمەتوۆا الماگۇل مەملەكەت باسشىسىنىڭ باستاماسىمەن جۇزەگە اسىرىلىپ جاتقان «اڭساعان ءسابي» باعدارلاماسىنىڭ جانە بالاسىز وتباسىلاردى مەملەكەتتىك قولداۋ شارالارىنىڭ وزەكتىلىگىن اتاپ ءوتتى. تۇركىستان وبلىسىنىڭ جامالوۆتار وتباسى وڭىردە اۋىل شارۋاشىلىعىن بەلسەندى دامىتۋدا. بيىل ەرلى- زايىپتىلار بىرگە ءومىر ءسۇرۋدىڭ 30 جىلدىعىن اتاپ وتەدى.

«ءبىزدىڭ وتباسىمىز - ەل تاۋەلسىزدىگىنىڭ قۇرداسى!»، - دەيدى وتاعاسى اسىلبەك تۇرسىنباي ۇلى. بۇدان باسقا، وتباسى كۇنى قارساڭىندا ەلوردادا ايدوس نۇربايەۆ پەن اراي ساپارعالي قىزى وتباسى نەكە كۋالىگىن الدى.

ايدوس - جەكە كاسىپكەر، اراي - جەتەكشى ينجەنەر- جوبالاۋشى. «مەرەيلى وتباسى» بايقاۋى - ءبىز ءۇشىن جاقسى بەلگى! ءبىز بويىمىزدى تۇزەگىمىز كەلەتىن ۇلگىلى وتباسىلاردىڭ اراسىندا بولعانىمىزعا قۋانىشتىمىز!» - دەپ، جاس جۇبايلار ويلارىمەن ءبولىستى.

2016 -جىلعى ۇلتتىق كونكۋرستىڭ جەڭىمپازدارى اقتوبە وبلىسىنىڭ نۇسقابايەۆتار وتباسىنىڭ وكىلى قايرات نۇسقابايەۆ بۇل كونكۋرستىڭ ونىڭ وتباسى مۇشەلەرىنىڭ بارلىعىنا ۇلكەن جاۋاپكەرشىلىك جۇكتەگەنىن ايتتى. «وسى جوعارى مارتەبەنى ابىرويمەن ساقتاۋ - ءبىزدىڭ پارىزىمىز»، - دەپ اتاپ ءوتتى ول جەڭىمپاز وتباسىلار مەن جاس جۇبايلارعا باقىت پەن مىقتى دەنساۋلىق تىلەي وتىرىپ. ءىس- شاراعا سونداي-اق قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ ءتورايىمى، پارلامەنت ءماجىلىسىنىڭ دەپۋتاتى ءلاززات رامازانوۆا، اقپارات جانە قوعامدىق دامۋ ءمينيسترى ايدا بالايەۆا، وبلىستاردىڭ، نۇر-سۇلتان، الماتى جانە شىمكەنت قالالارىنىڭ اكىمدەرى قاتىستى. ەل پرەزيدەنتى اتىنان لاۋرەات وتباسىلارعا ەستەلىك سىيلىقتاردى وڭىرلەردىڭ اكىمدەرى تابىس ەتتى.

ەستەرىڭىزگە سالا كەتەيىك، «مەرەيلى وتباسى» ۇلتتىق بايقاۋى ەلباسىنىڭ باستاماسىمەن 2013 -جىلى قۇرىلعان بولاتىن. بايقاۋدىڭ ماقساتى - وتباسى ينستيتۋتىن، وتباسىلىق قۇندىلىقتاردى نىعايتۋ، بالا تاربيەسىندەگى اتا-انالاردىڭ جاۋاپكەرشىلىگىن ارتتىرۋ، قازاقستاندىق وتباسىنىڭ جاعىمدى يميدجىن ناسيحاتتاۋ.