ەلوردادا ماس جولاۋشىنى تاكسيدە توناپ كەتتى

نۇر-سۇلتان. قازاقپارات - ەلوردادا ماس كۇيدە تاكسيگە وتىرعان جولاۋشىنى توناپ كەتتى.

بۇل تۋرالى نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، 38 جاستاعى ازامات كۇندىز ماس كۇيدە يمانوۆ پەن اسان قايعى كوشەلەرىنىڭ قيىلىسىندا تاكسيگە وتىرعان. كولىك ورنىنان قوزعالعاندا سالوننىڭ ارتىندا وتىرعان بەلگىسىز جاس جىگىت جابىرلەنۋشىدەن قۇندى زاتتارىن تالاپ ەتىپ، «سامسۋنگ» ماركالى تەلەفونىن تارتىپ العان. ال ءوزىن تاشەنوۆ كوشەسى بويىندا ءتۇسىرىپ كەتكەن. زارداپ شەگۋشى 5 كۇن وتكەننەن كەيىن پوليتسياعا شاعىمدانعان.

«جەدەل ىزدەۋ ءىس-شارالارى بارىسىندا 21 جاستاعى كۇدىكتى ۇستالدى. ۇستالعان ادام زارداپ شەگۋشىنىڭ تەلەفونىن ساتىپ جىبەرگەندىكتەن جاڭا تەلەفون ساتىپ الىپ بەرۋگە ءماجبۇر بولدى. توناۋ فاكتىسى بويىنشا قىلمىستىق ءىس قوزعالدى. تەرگەۋ بارىسىندا جاس جىگىتتىڭ بۇعان دەيىن دە ەلوردا اۋماعىندا كىسى توناعانى ءۇشىن قىلمىستىق جاۋاپقا تارتىلعانى انىقتالدى. قازىرگى ۋاقىتتا ونىڭ ءدال وسىنداي باسقا دا قىلمىستارعا قاتىستىلىعى تەكسەرىلىپ جاتىر»، - دەپ اتاپ وتەدى دەپارتامەنتتەن.