ءسىز قانشا ءتىرى بالا تۋدىڭىز: ساناقتاعى سۇراققا قاتىستى ۇلتتىق بيۋرو تۇسىنىك بەردى

نۇر- سۇلتان. قازاقپارات - بۇگىندە ەلىمىزدە حالىق ساناعى ءجۇرىپ جاتىر. قازاقستاندىقتار ونلاين ساناققا قاتىسۋ ءۇشىن الدىمەن ارنايى ساۋالنامانى تولتىرۋى ءتيىس.

وسى ورايدا كوپشىلىك ساناق ساۋالناماسىنداعى «ءسىز قانشا ءتىرى بالا تۋدىڭىز؟» دەگەن سۇراقتى تۇسىنبەي، جەلى قولدانۋشىلارى اراسىندا كەڭ تالقىعا ءتۇستى. ءوز كەزەگىندە ەلىمىزدىڭ ۇلتتىق ستاتيستيكا بيۋروسى رەسمي تۇسىنىكتەمە بەردى، دەپ حابارلايدى قازاقپارات ءتىلشىسى.

«الەۋمەتتىك جەلىلەردە ساناق ساۋالناماسىنداعى «ءسىز قانشا ءتىرى بالا تۋدىڭىز؟» دەگەن ساۋال توڭىرەگىندە پىكىرتالاس ءوربىپ جاتىر. اتالعان سۇراق ەۋروپالىق ستاتيستەر كونفەرەنسياسىنىڭ ۇسىنىسىمەن قوسىلعان بولاتىن. حالىق ساناعىن وتكىزۋدە سوڭعى 50 جىل بويى ايەلدەردىڭ ءتىرى تۋعان بالالارى جونىندەگى ساۋال كەڭىنەن قولدانىلىپ كەلەدى. سول سەكىلدى بۇل سۇراق دەموگرافيالىق زەرتتەۋ ءۇشىن دە ۇدايى قويىلادى. جانە دە ساۋالناما بيىل ەلىمىزدە ساناققا دەيىن جانە كەيىن دۇنيەگە كەلگەن سابيلەر مەن ولاردىڭ جىنىسىن انىقتاۋ سۇراعىمەن تولىقتى. سۇراقتىڭ جاۋابى نارەستە ءولىمى كورسەتكىشىن بالانىڭ جىنىسىنا قاراي تەرەڭ تالداۋعا قولدانىلادى»، - دەدى ق ر ۇلتتىق ستاتيستيكا بيۋروسىنىڭ رەسمي وكىلى ولجاس سايلاۋبەك ۇلى.

سونداي- اق، رەسمي وكىل اتالعان ساۋالدىڭ ەلىمىزدەگى بالا تۋۋ كورسەتكىشىنە قاتىستى دەرەكتەر جيناۋدا ماڭىزدى ەكەنىن ەسكە سالدى.

«كوپ جاعدايدا مۇنداي مالىمەتتى باسقا جەردەن الۋ مۇمكىن ەمەس. اتاپ وتەرلىگى، بۇل سۇراققا تەك قانا رەپرودۋكتيۆتى جاستاعى ايەلدەر عانا جاۋاپ بەرمەيدى. الىنعان مالىمەتتەر ءار كەزەڭدەگى تۋۋ مەن ءولىم تەندەنسياسىن سالىستىرۋ جانە باعالاۋ ءۇشىن دە قاجەت»، - دەيدى ول.

اۆتور: ءالي يبرايەۆ