قوردايدا وتاندىق ۆاكسينا شىعاراتىن زاۋىتتىڭ قۇرىلىسى اياقتالدى

قورداي. قازاقپارات - قوردايداعى ۆاكسينا شىعاراتىن زاۋىتتىڭ قۇرىلىسى اياقتالىپ، دايىن ءونىمدى قۇيۋعا تولىق دايىن، دەپ حابارلايدى قازاقپارات.

بۇل جايىندا جامبىل وبلىسىنىڭ اكىمى بەردىبەك ساپاربايەۆ پرەزيدەنتكە بەرگەن ەسەبىندە ايتىپ ءوتتى. ونىڭ سوزىنە سەنسەك، وبلىستاعى ۆاكسينا الۋعا ءتيىستى تۇرعىنداردىڭ 72,5 پايىزى ەكپە سالدىرعان. سونىمەن قاتار پرەزيدەنتكە ۆاكسينا شىعاراتىن زاۋىتتىڭ دايىن ءونىمدى قۇيۋعا تولىق ءازىر ەكەنى ايتىلدى. جۇمىس كەستەگە ساي ءجۇرىپ جاتىر.

زاۋىت پەن بيولوگيالىق قاۋىپسىزدىك پروبلەمالارى جونىندەگى عىلىمي زەرتتەۋ ينستيتۋتىنىڭ قىزمەتكەرلەرىنە ارنالعان ۇيلەر مەن اكت زالى بار دەنە شىنىقتىرۋ- ساۋىقتىرۋ كەشەنىنىڭ قۇرىلىسى جالعاسىپ جاتىر. اڭگىمە سوڭىندا قاسىم- جومارت توقايەۆ وبلىس اكىمىنە وسى باعىتتاعى جۇمىستاردى جالعاستىرۋ جونىندە ءبىرقاتار ناقتى تاپسىرما بەردى.