«ۆاكسينا الۋ ازاماتتىق پارىزىم»: استانالىقتار ەكپەنى قالاي الىپ جاتىر
ازاماتتارعا قانداي ۆاكسينا الۋ تاڭداۋى دا بار. قازاقستاندىقتار ەكپەنى ەمحانالاردان بولەك، ويىن- ساۋىق جانە ءىرى ساۋدا ورتالىقتارىنان دا الا الادى. وسى ورايدا ەلوردادا حالىقتىڭ ىندەتكە قارسى ۆاكسينا الۋ بارىسى قالاي ءجۇرىپ جاتقانىن قازاقپارات ءتىلشىسى ءبىلىپ قايتتى.
ەلوردا جۇرتىنىڭ ۆاكسينا الۋ بارىسىن قاداعالاۋ ماقساتىندا «حانشاتىر»، «كەرۋەن»، «ابۋ-دابي پلازا» جانە «MEGA Silk Way» ويىن- ساۋىق جانە ساۋدا ورتالىعىن ارالادىق. ايتا كەتسەك، بۇگىندە قالا بويىنشا 80-نەن استام ۆاكسينا الۋ بەكەتى جۇمىس ىستەپ تۇر جانە وعان 300-دەن استام مامان جۇمىلدىرىلعان. قازىرگى ۋاقىتتا حانشاتىر ويىن- ساۋىق جانە ساۋدا ورتالىعىنداعى ۆاكسينا الۋ بەكەتىندە سپۋتنيك جانە Vero Cell (Sinopharm) قولجەتىمدى ەكەن.
«وسى جەردە 2 ۆولونتەر جۇمىس ىستەيمىز. ءبىزدىڭ مىندەت كەلۋشىلەرگە كومەك كورسەتۋ. ياعني ۆاكسينا الۋعا قاتىستى سۇراقتارعا جاۋاپ بەرەمىز. كەلۋشىلەردىڭ سانى اركەزدە ءارقالاي، مىسالى دۇيسەنبى وتە كوپ بولدى، بۇگىن ادامنىڭ قاراسى ازداۋ. ءبىزدىڭ بەلگىلى جۇمىس كەستەمىز بار، مەن تاڭەرتەڭگى ساعات 9-دان كەشكى 17:00-گە دەيىن وسىندامىن. ءوز باسىم ۆاكسينا الۋدى قولدايمىن، مەن سپۋتنيكتىڭ ءبىرىنشى كومپونەنتىن الدىم، جۋىردا ەكىنشىسىن الامىن»، - دەدى ۆولونتەر (اتى- ءجونىن كورسەتپەۋدى ءوتىندى).
اتالعان ساۋدا ۇيىندە ورنالاسقان ۆاكسينا بەكەتىنە حالىق ەندى جينالا باستادى. «مەن بۇگىن سپۋتنيكتىڭ ەكىنشى كومپونەنتىن الۋعا كەلىپ وتىرمىن. ءبىرىنشى دوزانى ءساتتى الدىم، ەشقانداي كەرى اسەرى بولمادى. ەكپە اركىمگە ءارقالاي اسەر ەتەدى، كەيبىرەۋلەر ۆاكسينا العاننان كەيىن ءوزىن جايسىز سەزىنىپ جاتىر ەكەن دەپ ەستىپ جاتامىن. مەن دە ءبارى ويداعىداي بولدى. بۇل جولى دا سولاي بولادى دەپ ويلايمىن، كەزەگىمدى كۇتىپ وتىرمىن»، - دەيدى قالا تۇرعىنى جۇماگۇل بەگۋلينا.
ءوز كەزەگىمىزدە ماماننىڭ پىكىرىن ءبىلۋدى دە ءجون كوردىك. «باستاپقىداعىداي ەمەس قازىر ۆاكسينا الۋشىلاردىڭ قارقىنى جاقسى. ءوزىم ەكپەنى اقپان ايىندا العام. ال ۆاكسينا الۋ بەكەتىندە ءساۋىر ايىنان باستاپ جۇمىس ىستەپ كەلەم. كوبىنەسە كەشقۇرىم ادام اعىلادى، جۇمىستان سوڭ كەلەدى- اۋ دەيمىن. دەمالىس كۇندەرى دە ەكپە الۋعا نيەتتىلەر جەتكىلىكتى. كەيبىر كەلۋشىلەر ۆاكسينا العىسى كەلگەنىمەن ءبىراق ۇرەي، قورقىنىشتىڭ بارىن ايتادى، ونداي جاعدايدا ءبىزدىڭ ماماندار ءوز كەڭەسىن ۇسىنادى. باستىسى حالىق ءوز ەركىمەن كەلىپ جاتىر، ەكپە الۋعا نيەتتى»، - دەدى ۆاكسينا سالۋشى مەدبيكە گۇلزادا احمەتوۆا.
ەكپە سالۋ ورىندارىندا نەگىزگى مامانداردان بولەك، قاجەت جاعدايدا مەديتسينالىق كەڭەسىن ۇسىناتىن قىزمەتكەر دە بار ەكەن.
«مەن وسى جەردەگى ۆاكسينا الۋ پروتسەسىن ۇيىمداستىرۋعا جاۋاپتىمىن. ودان بولەك، ماماندار مەن كەلۋشىلەردىڭ ۆاكسيناعا قاتىستى سۇراقتارىنا جاۋاپ بەرىپ، كەڭەس بەرەمىن. ءبىزدىڭ بەكەتتە كەلۋشىلەر ءۇشىن بارلىق جاعداي جاسالعان. كەلگەن ادام الدىمەن ساۋالناما تولتىرادى، سودان سوڭ تەراپيەۆت ماماننىڭ قاراۋىنان وتەدى. ماماننىڭ رۇقساتىنان سوڭ كەزەك بويىنشا قالاعان ەكپەنى الادى. ەكپەدەن سوڭ جارتى ساعاتتاي وتىرىپ، دەمالعانى ابزال. قاجەت جاعدايدا ماماندارىمىز ەكپە الۋعا كومەگىن ۇسىنا الادى. مەن ءوزىم بۇل جەردە 25 -تامىزدان بەرى جۇمىس ىستەپ كەلەمىن، وسى ۋاقىت ارالىعىندا 2 مىڭنان ادامدى قابىلدادىم. ۆاكسينالاردى ساقتاۋعا دا كوپ ءمان بەرىلەدى. ارنايى مۇزداتقىشتا، بەلگىلەنگەن تەمپەراتۋرادا ساقتالادى. ودان بولەك، كەلۋشىلەرگە ۆاكسينا العاننان كەيىنگى تالاپتار تۇسىندىرىلەدى. نەمەسە ۇيىنە بارعان سوڭ ءوزىن جايسىز سەزىنسە نە ىستەۋ كەرەك جانە حابارلاسۋ قاجەتتىگىن ايتامىز»، - دەدى كونسۋلتانت- دارىگەر مايكامال ەسىلبايەۆا.
سونداي- اق، دارىگەر اتالعان بەكەتكە كەلۋشىلەر كوبىنەسە Vero Cell (Sinopharm) جانە QazVac ۆاكسيناسىن الىپ جاتقانىن تىلگە تيەك ەتتى. ساۋدا ۇيلەرىن ارالاۋ كەزىندە ۆاكسينا بەكەتىنەن «استانا وپەرا» وپەرا جانە بالەت تەاترىنىڭ ءسوليسى، تانىمال ءارتىس، بەيىمبەت تاڭارىقوۆتى كەزدەستىردىك.
«ۆاكسينانىڭ ءبىرىنشى كومپونەنتىن الۋعا كەلدىم. تاڭداۋىم رەسەيلىك ۆاكسيناعا ءتۇستى. ءوز باسىن جانە اينالاسىنداعى جانداردى ىندەتتەن قورعاۋ ءۇشىن ۆاكسينا الۋ كەرەك دەپ ويلايمىن. وتباسىمىزدى، جاقىندارىمىزدى، دوس- ارىپتەستەرىمىزدى قورعاۋىمىز كەرەك. مەنىڭ ارىپتەستەرىم دە ۆاكسينا الىپ جاتىر»، - دەيدى ول.
ساۋدا ورتالىقتارىندا ۆاكسينا بەكەتتەرى جۇمىس جانە دەمالىس كۇندەرى جۇمىس ىستەپ تۇر. مامانداردىڭ ايتۋىنشا، ۆاكسينا الۋعا نيەت بىلدىرۋشىلەردىڭ قاتارىندا COVID-19-بەن اۋىرىپ شىققاندار دا بار ەكەن.
«قازىر بىزدە سپۋتنيك، Vero Cell (Sinopharm) جانە QazVac ۆاكسيناسى بار. ۆاكسينا الماس بۇرىن پاتسيەنت ساۋالناما تولتىرىپ، تەراپيەۆت مامانىڭ تەكسەرۋىنەن وتەدى. ەكپە الۋعا كەلگەنىمەن كەيدە ول ادامعا مەديتسينالىق تۇرعىدان رۇقسات جوق بولىپ شىعادى. ونداي ءساتتى دارىگەرلەر قاداعالاپ وتىرادى. قالاي بولادى ەكەن دەپ ۇرەيمەن كەلەتىندەر مە بار. سول سياقتى كوروناۆيرۋسپەن اۋىرعان سوڭ ەكپە الۋعا بەل بۋعانداردا كەلىپ جاتادى. مەن حالىققا ۆاكسينا ەگۋمەن وسى بەكەتتە 6-اي جۇمىس ىستەپ كەلەمىن. جۇمىس ۋاقىتى تاڭەرتەڭگى ساعات 10:00-نان كەشكى 22:00-گە دەيىن»، - دەدى ۆاكسينا سالۋشى مامان جانەركە جايلاۋوۆا.
ءبىز بولعان 4 ويىن- ساۋىق جانە ساۋدا ورتالىقتارىنداعى ۆاكسينا الۋ بەكەتىنە حالىقتىڭ تۇسكى ۇزىلىستە جانە كەشكە اعىلاتىنى بايقالدى.
«ۆاكسينا الۋعا قاتىستى ءبىراز ويلانىپ ءجۇردىم. ماسەلە كۇدىكتەنگەنىمدە ەمەس، قاي ءتۇرىن السام ەكەن دەپ. ويلانا كەلە سپۋتنيك الۋدى شەشتىم. وتباسىمدا مەنەن باسقالارى الدەقاشان الىپ قويعان. سوسىن مەندە ۋاقىتتى سوزبايىن دەدىم، دەنساۋلىقپەن ويناۋعا بولمايدى. جالپى ۆاكسينا الۋدى دەنساۋلىقتان بولەك، ازاماتتىق پارىزىم دەپ ويلايمىن. ازىرگە ءوزىمدى جاقسى سەزىنىم تۇرمىن، ەشقانداي كەرى اسەرى سەزىلمەيدى»، - دەيدى استانالىق وماربەك قالتايەۆ.
