08:22, 09 - قىركۇيەك 2021 | GMT +5
«تاليبان» اۋعانستاندا جالپىعا ورتاق سايلاۋ وتكىزۋدى كوزدەپ وتىر
كاير. قازاقپارات - اۋعانستاندا بيلىكتى باسىپ العان راديكالدى «تاليبان» قوزعالىسى ەلدەگى قالىڭ بۇقارا توپتارىنىڭ قاتىسۋىمەن جالپىعا ورتاق سايلاۋ وتكىزۋدى جوسپارلاپ وتىر.
بۇل تۋرالى قازاقپارات كاتاردىڭ Al Jazeera تەلەارناسىنا سىلتەمە جاساپ حابارلايدى.
«اۋعان قوعامىنىڭ كەڭ اۋقىمىن قامتيتىن جالپىعا ورتاق سايلاۋ وتكىزۋ جوسپارلانۋدا .. . ءبىز حالىق بۇقارا توپتارىن جانە تاليبان مۇشەلەرى ەمەس تالانتتى ادامداردى تارتۋعا تىرىسامىز»، - دەگەن «اۋعانستان يسلام امىرلىگى» (تالىپتەردىڭ اتاۋى) اقپارات جانە مادەنيەت مينيسترلىگى وكىلىنىڭ ءسوزىن كەلتىرەدى تەلەارنا.
سەيسەنبىدە راديكالدار جاريالاعان ۋاقىتشا ۇكىمەتتىڭ قۇرامى تۋرالى ايتاتىن بولساق، وعان نەگىزىنەن پۋشتۋندار كىردى (ەلدەگى ەڭ ۇلكەن ەتنيكالىق توپ وكىلدەرى). دەگەنمەن اتالعان ۆەدومستۆو وكىلىنىڭ ايتۋىنشا، تالىپتەر ءۇشىن ماڭىزدىسى - مينيسترلەر كابينەتى مۇشەلەرىنىڭ ەتنيكالىق شىعۋ تەگى ەمەس، قابىلەتتىلىگى.
