قىرىمبەك كوشەربايەۆ شەتەلدە كادر دايارلاۋ جونىندەگى رەسپۋبليكالىق كوميسسيانىڭ وتىرىسىن وتكىزدى

نۇر-سۇلتان. قازاقپارات - قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى، دەپ حابارلايدى قازاقپارات اقورداعا سىلتەمە جاساپ.

كوميسسيا شەشىمىمەن «بولاشاق» حالىقارالىق ستيپەندياسى ماگيستراتۋرا، دوكتورانتۋرا، رەزيندەنتۋرا بويىنشا وقۋدان وتەتىن، سونداي-اق الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمدامادان وتۋگە جىبەرىلەتىن 196 ۇمىتكەرگە بەرىلدى.

وتىرىستا ءبىلىم جانە عىلىم ءمينيسترى اسحات ايماعامبەتوۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيا حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى، سونداي-اق «بولاشاق» حالىقارالىق ستيپەندياسىن ىسكە اسىرۋعا قاتىستى ءبىرقاتار ماسەلەلەر قارالدى.

2021-جىلى «بولاشاق» باعدارلاماسى بويىنشا وقۋعا 1055 ستيپەنديا ءبولىندى. ونىڭ ىشىندە 555 ستيپەنديا ماگيستراتۋرا، رەزيدەنتۋرا، دوكتورانتۋرا، تاعىلىمداما باعدارلامالارى بويىنشا بولىنگەن.

تاعى 500 ستيپەنديا «عالىمدار» تاعىلىمداماسىنىڭ جاڭا ساناتى بويىنشا بەرىلدى.

بۇل سانات پرەزيدەنت قاسىم-جومارت توقايەۆتىڭ تاپسىرماسىنا سايكەس، الەمنىڭ جەتەكشى عىلىمي ورتالىقتارىندا جىل سايىن 500 عالىمنىڭ تاعىلىمدامادان ءوتۋىن قامتاماسىز ەتۋ ماقساتىندا بەكىتىلگەن.

«بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ وسى جىلعى 4- مامىردان 28- قازانعا دەيىن جالعاسادى. وتىرىس قورىتىندىسى بويىنشا قىرىمبەك كوشەربايەۆ ءبىرقاتار ناقتى تاپسىرمالار بەردى.