پاۆلودار وبلىسىندا قاراۋسىز قالعان بۇقا بىرەۋدىڭ كولىگىن ءسۇزىپ، ءبۇلدىردى

پاۆلودار. قازاقپارات - وقىس وقيعا پاۆلودار وبلىسىنىڭ تەرەڭكول اۋىلىندا بولعان، دەپ حابارلايدى قازاقپارات ءتىلشىسى.

«اۋىل تۇرعىنى ءوزىنىڭ مالىن ورىستەن ۋاقىتىندا كۇتىپ الماعان. ناتيجەسىندە يەسىنە «رەنجىگەن» بۇقا اۋىل كوشەلەرىن كەزىپ جۇرگەن. ءبىر كەزدە بۇقانىڭ كوزى تۇراقتا تۇرعان «ۋاز پاتريوت» كولىگىنە تۇسەدى. اۆتوكولىككە ارقاسىن قاسىماق بولعان بۇقا وعان زاقىم كەلتىردى»، - دەدى پاۆلودار وبلىسىنىڭ پوليتسيا دەپارتامەنتىنىڭ وكىلى.

كولىك يەسى باسقا بىرەۋدىڭ بۇقاسىنىڭ كولىگىن زاقىمداعانىن كورىپ، بىردەن پوليتسياعا حابارلاعان.

«مالدىڭ يەسى تابىلدى. ول اكىمشىلىك جاۋاپقا تارتىلدى. «مالدى ورىسكە جىبەرگەن كەزدە ونى قاراۋسىز قالدىرماڭىز، ۋاقىتىندا كۇتىپ الىڭىز. ءسىزدىڭ بەيقامدىعىڭىزدىڭ سالدارى شىعىنعا ۇشىراتۋى مۇمكىن»، - دەيدى ءتارتىپ ساقشىلارى.