جۇرگىزۋشى كۋالىگىنە ەمتيحان تاپسىرۋ ءتارتىبى وزگەرەدى

نۇر-سۇلتان. قازاقپارات - ق ر ىشكى ىستەر مينيسترلىگى مەن ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى «ءارتۇرلى ساناتتاعى كولىك قۇرالدارىن باسقارۋ قۇقىعىنا جۇرگىزۋشى كۋالىگىن الۋعا تەوريالىق جانە پراكتيكالىق ەمتيحانداردى قابىلداۋدى وڭتايلاندىرۋ» پيلوتتىق جوباسىن ىسكە قوسۋ تۋرالى بىرلەسكەن بۇيرىق شىعاردى، دەپ حابارلايدى قازاقپارات ءتىلشىسى.

«2021 -جىلعى 1-قازاننان باستاپ 2022 -جىلعى 30-قىركۇيەككە دەيىنگى كەزەڭدە ء«ارتۇرلى ساناتتاعى كولىك قۇرالدارىن باسقارۋ قۇقىعىنا جۇرگىزۋشى كۋالىگىن الۋعا تەوريالىق جانە پراكتيكالىق ەمتيحاندار قابىلداۋدى وڭتايلاندىرۋ» پيلوتتىق جوباسى وتكىزىلسىن»، - دەپ جازىلعان بىرلەسكەن بۇيرىق جوباسىندا.

جاڭا قۇجات بويىنشا ەمتيحان تاپسىرۋ ءتارتىبى مىناداي:

- تەوريالىق ەمتيحان تاپسىرماعان جۇرگىزۋشى پراكتيكالىق ەمتيحانعا جىبەرىلمەيدى. تەوريالىق ەمتيحان دا پراكتيكالىق ەمتيحان دا قايتادان تاعايىندالۋ ءۇشىن الدىڭعى ەمتيحان وتكىزىلگەن كۇننەن ءبىر جۇمىس كۇنى ءوتۋى كەرەك.

- تەوريالىق ەمتيحان وپەراتوردىڭ قاتىسۋىمەن «ازاماتتارعا ارنالعان ۇكىمەت «مەملەكەتتىك كورپوراتسياسى» ك ە ا ق ايقىندايتىن تارتىپپەن وتكىزىلەدى. وپەراتور ەمتيحان تاپسىرۋشىلاردىڭ بەلگىلەنگەن تالاپتاردى ساقتاۋىن باقىلاۋى ءتيىس.

- تەوريالىق ەمتيحاندى تاپسىرۋ ءۇشىن ەمتيحان كۇنىنەن كەمىندە ءبىر كۇن بۇرىن (جۇمىس كۇنى) «ەلەكتروندىق ۇكىمەت» پورتالى ارقىلى، پورتالدىڭ ينتەگراتسيالىق سەرۆيستەرى ارقىلى نەمەسە مەملەكەتتىك كورپوراتسياعا جۇگىنۋ ارقىلى ءوتىنىش بەرە الادى.

- مەملەكەتتىك كورپوراتسياعا جۇگىنگەن كەزدە ەمتيحان تاپسىرۋشى جەكە باسىن كۋالاندىراتىن قۇجاتتى نەمەسە سيفرلىق قۇجاتتار سەرۆيسىنەن ەلەكتروندىق قۇجاتتى ۇسىنادى.

- وپەراتور جەكە باستى كۋالاندىراتىن قۇجاتتى نە ەلەكتروندىق قۇجاتتى مەملەكەتتىك اقپاراتتىق جۇيەلەردەگى مالىمەتتەرمەن سالىستىرىپ تەكسەرەدى.

- «ەمتيحان تاپسىرۋشىنىڭ» جەكە كابينەتىندە» نە پورتالدىڭ ءتيىستى ينتەگراتسيالىق سەرۆيسىندە مەملەكەتتىك قىزمەت كورسەتۋ ءۇشىن ءوتىنىمنىڭ قابىلدانعانى تۋرالى مارتەبە كورسەتىلەدى.

- ەمتيحان الۋشى پراكتيكالىق ەمتيحان تاپسىرۋ ءۇشىن تەوريالىق تەستىلەۋ كۇنىنەن كەمىندە ءبىر كۇن (جۇمىس كۇنى) بۇرىن ەمتيحان تاپسىرۋ ورنىن، كۇنى مەن ۋاقىتىن ءوزى تاڭدايدى.

- تەستىلەۋگە وزىمەن بىرگە جەكە باسىن كۋالاندىراتىن قۇجاتى نە ەلەكتروندىق قۇجاتى بار جۇرگىزۋشىلىككە ۇمىتكەر جىبەرىلەدى. ەمتيحان الۋشىنىڭ جەكە باسىن سايكەستەندىرۋ ەمتيحان الۋشىنىڭ بيومەتريالىق دەرەكتەرىن مەملەكەتتىك اقپاراتتىق جۇيەلەردەگى مالىمەتتەرمەن سالىستىرۋ ارقىلى جۇرگىزىلەدى.

- تەستىلەۋ باستالعانعا دەيىن وپەراتور ەمتيحان الۋشى ءۇشىن نۇسقاما وتكىزەدى جانە تۋىنداعان سۇراقتارعا جاۋاپ بەرەدى.

- ەگەر ەمتيحان الۋشى تەوريالىق ەمتيحان تاپسىرار الدىندا ءوزىن ناشار سەزىنسە، وپەراتورعا حابارلاۋى ءتيىس. بۇل جاعدايدا مۇنداي ەمتيحان الۋشىدان ەمتيحان قابىلداۋ وسى كۇنگى باسقا ۋاقىتتا نەمەسە كەستەگە سايكەس باسقا كۇنى جۇرگىزىلەدى.

- ەمتيحان تەستىندە 40 سۇراق بار. ءار سۇراققا بىرنەشە جاۋاپ بەرىلەدى، سولاردىڭ ىشىنەن دۇرىسىن تاڭداۋى كەرەك. ەمتيحان الۋشىنىڭ قالاۋى بويىنشا تەوريالىق ەمتيحاندى قازاق، ورىس نەمەسە اعىلشىن تىلدەرىندە تاپسىرۋعا جول بەرىلەدى.

- ەمتيحان تاپسىرۋشىنىڭ باسقا كانديداتتارمەن سويلەسۋگە، ماتەريالدارمەن الماسۋعا، قاعاز، ەلەكتروندى جانە باسقا اقپارات قۇرالدارىندا اقپاراتتى پايدالانۋعا، بولمەدەن شىعۋعا بولمايدى.

- ەمتيحان الۋشىلاردىڭ ۇيالى تەلەفوندار مەن وزگە دە ەلەكتروندىق جابدىقتاردى الىپ كىرۋىنە جانە كىرگىزۋىنە جول بەرىلمەيدى. مۇنداي قۇرىلعىلار تەوريالىق ەمتيحاندى قابىلداۋ كەزىندە ۇياشىقتارى بار ارنايى شكافتاردا ساقتالادى. تەوريالىق ەمتيحان ءساتى باقىلاۋ كامەراسىنا جازىلادى.

- بۇل تالاپتار بۇزىلسا، وپەراتور ەمتيحان تاپسىرۋ پروتسەسىن توقتاتىپ، ەمتيحان قابىلداۋ جانە جۇرگىزۋشى كۋالىكتەرىن بەرۋ ەرەجەلەرىن بۇزۋ تۋرالى اكت جاسايدى.

- ەمتيحان الۋشىنىڭ بيومەتريالىق دەرەكتەرىن مەملەكەتتىك اقپاراتتىق جۇيەلەردەگى مالىمەتتەرمەن سالىستىرۋ ناتيجەلەرى بويىنشا سايكەسسىزدىك انىقتالسا، بۇل ادام ەمتيحانعا جىبەرىلمەيدى. ال وپەراتور ەمتيحان تاپسىرۋشىنىڭ جەكە باسىن سايكەستەندىرۋدەن وتپەگەنى تۋرالى اكتىنى مەملەكەتتىك كورپوراتسيا انىقتايتىن نىساندا جاسايدى.

- ەمتيحانعا بولىنگەن ۋاقىت وتكەننەن كەيىن تەوريالىق ەمتيحاندى تاپسىرۋ اۆتوماتتى تۇردە توقتاتىلادى.

- دۇرىس جاۋاپتاردى ەسەپتەۋ كومپيۋتەرلىك تەستىلەۋ باعدارلاماسىنىڭ كومەگىمەن اۆتوماتتى تۇردە جۇزەگە اسىرىلادى. ەمتيحان اياقتالعاننان كەيىن ەمتيحان الۋشى كومپيۋتەر ەكرانىندا كورسەتىلگەن تەوريالىق ەمتيحاندى تاپسىرۋ ناتيجەلەرىمەن تانىسادى.

- تەوريالىق ەمتيحاندى تاپسىرۋ ناتيجەلەرى تۋرالى دەرەكتەر ەمتيحان الۋشىنىڭ پورتالداعى جەكە كابينەتىنە، سونداي- اق پورتالدىڭ ءتيىستى اقپاراتتىق جۇيەلەرى مەن ينتەگراتسيالىق سەرۆيستەرىنە بەرىلەدى. تەوريالىق ەمتيحاندى تاپسىرۋ ناتيجەلەرى ونى تاپسىرعان كۇننەن باستاپ ءبىر جىل بويى جارامدى.

- «ا»، «ۆ» ساناتتارىنداعى، «ا1»، «ۆ1» كىشى ساناتىنداعى كولىك قۇرالدارىن باسقارۋ قۇقىعىن الۋعا ءوز بەتىنشە دايارلىقتان وتكەن جۇرگىزۋشىلىككە ۇمىتكەرلەر تەوريالىق ەمتيحان تاپسىرۋ كەزىندە پراكتيكالىق ەمتيحان تاپسىرۋ كەزىندە ءۇش رەت تەرىس باعا السا، التى ايدان كەيىن عانا قايتا تاپسىرا الادى. پراكتيكالىق ەمتيحان تاپسىرۋ كەزىندە ءۇش رەت تەرىس باعا العان جاعدايدا تەوريالىق ەمتيحان ناتيجەلەرى اۆتوماتتى تۇردە جويىلادى. قۇجات جوباسى 22-قىركۇيەككە دەيىن «اشىق ن ق ا» سايتىندا تالقىلانادى.

اۆتور: ەسىمجان ناقتىباي