كورەيا تەڭىز تۇبىنە كولىك جولىن سالدى
بۇل الەمدەگى ۇزىندىعى بويىنشا 5-ورىندى الاتىن سۋاستى جولى.
ۆلاديسلاۆ سوي، ءتىلشى:
- ارتىمدا ۆونسان ارالى كورىنىپ تۇر. بۇرىن وعان تەك كەمەمەن جەتۋگە بولاتىن. كۇنىنە ون رەت قاتىنايتىن. ال ەندى تۋنەل ارقىلى كەز كەلگەن ۋاقىتتا اۆتوكولىكپەن نەبارى بەس مينۋتتا جەتۋگە بولادى.
ۇزىندىعى جەتى شاقىرىمداي سۋ استىنداعى توننەل - كورەيالىق قۇرىلىسشىلاردىڭ ماقتانىشى. مۇندا ءبارى ۇساق- تۇيەككە دەيىن ويلاستىرىلعان: جەلدەتۋ، كارىز جانە ەلەكتروندى ديسپلەيلەر. ءتىپتى جەر ۇستىمەن وتەتىن توننەلدەردىڭ قۇرىلىسىنا قاراعاندا ءبىر جارىم ەسە تىعىز تسەمەنت قولدانىلعان. ينجەنەرلەردىڭ ايتۋىنشا، بۇل نىساندى ءجۇز جىل بويى پايدالانۋعا بولادى. ەكى باعىتقا جۇرۋگە بولاتىن 2 توننەل سالىنعان. جول وقيعاسى بولا قالعان جاعدايدا ەكى جول اراسىنداعى وتپە جولدار ارقىلى جەدەل جاردەم ماشينالارى كىرە الادى.
- توننەلدە ۇيالى بايلانىس بازاسى ورناتىلعان، سوندىقتان تەلەفونداردى پايدالانۋعا بولادى. زياندى شىعارىندىلاردى باقىلاۋ جۇيەسى دە بار.
كيم ۋن ەن، ايماقتىق قۇرىلىس جانە مەنەدجمەنت باسقارماسىنىڭ باسشىسى:
- نىسانىمىز تەڭىزدىڭ استىنا 80 مەتر تەرەڭدىكتە سالىنعان، سوندىقتان ەڭ قيىنى سۋ اعىنىن توقتاتۋ بولدى. بۇل ماسەلەنى شەشۋ ءۇشىن ءبىز گيدرووقشاۋلاعىش جاسادىق جانە بارلىق قاۋىپسىزدىك شارالارىن ساقتادىق، 11 جىلعا سوزىلعان قۇرىلىستا ءبىر دە ءبىر قىزمەتكەرىمىز زارداپ شەككەن جوق. توننەلدىڭ قۇنى 417 ميلليون 383 مىڭ دوللار.
ۇكىمەت ىندەت ءورشىپ تۇرعان كەزدە سالىنعان بۇل قۇرىلىس مول پايدا اكەلەدى دەپ سەنەدى. ويتكەنى وسى جول ارقىلى ۆونسان ارالىنا تۋريستەر اعىنى ارتادى دەپ كۇتىلۋدە. مۇندا قازىردىڭ وزىندە قوناقۇيلەر مەن دەمالىس ورتالىقتارىنىڭ قۇرىلىسى قارقىندى ءجۇرىپ جاتىر. سونىمەن قاتار ايماق بالشىق جانە گۇلدەر فەستيۆالدارىمەن تانىمال. كوروناۆيرۋس كەسىرىنەن شەتەلدىك قوناقتاردىڭ سانى ايتارلىقتاي ازايعانىمەن ەلدىڭ باسقا ايماقتارىنان كەلەتىن تۋريستەر سانى جىل سايىن ءوسىپ كەلەدى.
ۆلاديسلاۆ سوي، ولگا ليان
www.24.kz
