الماتى اۋەجايىن اۋرەگە سالعان مىسىق تابىلدى
جانۋاردىڭ يەسى كاتيرا كابدۋۆاحيت ءوزىنىڭ Instagram پاراقشاسىندا 3 - قىركۇيەكتە بارلىق قاجەتتى انىقتامالاردى جيناپ، مىسىقتى كولىك كومپانياسى ارقىلى الماتىدان الىپ كەتكەنىن ايتقان ەدى.
ءبىراق، جەزقازعانعا جەتكەن سوڭ مىسىقتىڭ جوق ەكەنى، كەيىنىرەك ونى بورتقا قابىلداماعانى جانە ونىڭ قويمادا قالعانى بەلگىلى بولدى. مىسىق تەك 3- قىركۇيەكتىڭ تۇنىندە يەسىنە جاراقاتپەن جەتكىزىلدى.
وسىعان بايلانىستى الماتى اۋەجايىنىڭ باسپا ءسوز قىزمەتى 4- قىركۇيەك كۇنى الماتى حالىقارالىق اۋەجايىندا مىسىق يەسىنىڭ ءوتىنىشى بويىنشا جەدەل قىزمەتتىك تەكسەرۋ جۇرگىزىلگەنىن، جانۋاردى الىپ جۇرۋگە، تيەۋگە جانە جونەلتۋگە قاتىستى قىزمەتكەرلەردىڭ سۇرالعانىن، جۇك قويماسى مەن ۇشاق تۇراعىنداعى بەينەباقىلاۋ كامەرالارى زەرتتەلگەنىن مالىمدەدى.
«ناتيجەسىندە، جۇك تيەلگەنگە دەيىن تاسىمال زاتىنىڭ زاقىمدالماعانى، جانۋاردىڭ جاراقات الماعانى انىقتالدى، قىزمەتكەرلەر توردىڭ سوعىلۋىنا جانە قۇلاۋىنا جول بەرمەگەن. جۇك بولىمىنە جۇكتەپ جاتقان كەزدە، مىسىق الاڭداي باستاپ، توردىڭ ەسىگىن بۇزىپ، پەررونعا سەكىرىپ شىعىپ كەتكەن. ءبىراز ۋاقىتقا دەيىن ول ۇشقالى جاتقان لاينەرلەردىڭ، ولارعا قىزمەت كورسەتەتىن ارنايى ماشينالارعا جاقىن جەردە، پەرروندا جۇگىرىپ جۇرگەن. وسىدان كەيىن ول مەتال قورشاۋ-تورىنا ورمەلەپ، تەحنيكا جۇمىس ىستەپ جاتقان قۇرىلىس الاڭىنا ءوتىپ كەتكەن.
ءدال وسى ساتتە ونىڭ جاراقات الۋى ابدەن مۇمكىن. جارتى ساعات بويى ول قۇرىلىس الاڭىندا تىعىلىپ ءجۇردى، جانۋاردى ودان سايىن شوشىتپاۋ ءۇشىن شۋ مەن جۇمىس توقتاتىلدى. ال اۋەجاي قىزمەتكەرلەرى بولسا، مىسىقتىڭ ارنايى تەحنيكا دوڭعالاقتارىنىڭ استىندا قالىپ قويماۋى ءۇشىن ونى تەز اۋلاۋعا كۇش سالعان.
مىسىقتى ىزدەپ جاتقاندا ۇشاق ءوز كەستەسى بويىنشا ۇشىپ كەتكەن. تابىلعان مىسىق جۇك تەرمينالىنا قايتارىلادى، ورىن العان جاعداي ءبىر ساعات ىشىندە Asia Freight كومپانياسىنا حابارلاندى. كومپانيا قىزمەتكەرلەرى مىسىقتىڭ يەسىنە تەز ارادا حابارلاسىپ، ولارعا بولعان جاعداي تۋرالى حابارلاۋى كەرەك ەدى»، - دەپ ناقتىلادى ۆەدومستۆودان.
