ۇيىمداسقان قىلمىستىق توپ شەكارادان زاڭسىز مال وتكىزىپ كەلگەن

نۇر- سۇلتان. قازاقپارات - ق ر اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ لاۋازىمدى تۇلعالارى كاسىپكەرلەردەن مالدى شەكارادان كەدەرگىسىز شىعارعانى ءۇشىن پارا الۋدىڭ سىبايلاس جەمقورلىق سحەماسىن ۇيىمداستىرعان.

بۇل تۋرالى قازاقپارات ق ر سىبايلاس جەمقورلىققا قارسى ءىس- قيمىل اگەنتتىگىنىڭ باسپا ءسوز قىزمەتىنە سىلتەمە جاساپ حابارلايدى.

ۆەدومستۆونىڭ مالىمەتى بويىنشا، 2021 -جىلدىڭ ماۋسىم ايىنان باستاپ اگەنتتىك وكىلدەرى پرەزيدەنتتىڭ تاپسىرماسى بويىنشا اگروونەركاسىپتىك كەشەنىندە سۋبسيديالاۋ سالاسىنا اۋقىمدى تالداۋ جۇرگىزىپ جاتىر. سول ارقىلى سۋبسيديا بەرۋدىڭ اشىق، ءادىل جۇيەسىن قامتاماسىز ەتۋ، سىبايلاس جەمقورلىق پەن بيۋروكراتيا دەڭگەيىن تومەندەتۋ، بيزنەس جۇرگىزۋگە كەدەرگى كەلتىرەتىن اكىمشىلىك كەدەرگىلەردى جويۋ كوزدەلىپ وتىر.

«تالداۋ اياسىندا ۆەتەرينارلىق باقىلاۋ جانە قاداعالاۋ كوميتەتى مەن ونىڭ اۋماقتىق ينسپەكسيالارىنىڭ لاۋازىمدى تۇلعالارىنىڭ ارەكەتىنەن ۇيىمداسقان قىلمىستىق توپتىڭ بەلگىلەرى انىقتالدى. اتالعان توپ كاسىپكەرلەردەن مالدى شەكارادان كەدەرگىسىز شىعارعانى ءۇشىن جۇيەلى تۇردە پارا الۋعا مۇمكىندىك بەرەتىن سىبايلاس جەمقورلىق سحەماسىن ۇيىمداستىرعان. بۇل رەتتە مەملەكەت سۋبسيديالاعان اسىل تۇقىمدى مالدى اكەتۋ، جانۋارلاردى ەپيزووتيالىق باقىلاۋسىز تاسىمالداۋ فاكتىلەرى انىقتالدى. سالدارىنان ەپيدەميولوگيالىق جاعدايعا تەرىس اسەر كەلۋى مۇمكىن»، - دەپ جازادى اگەنتتىكتىڭ باسپا ءسوز قىزمەتى.

انتيكوردىڭ مالىمەتىنشە، قىلمىستىق توپتىڭ ءار مۇشەسى ءوز «مىندەتىن» مۇلتىكسىز ورىنداپ وتىرعان.

«قولدانىستاعى ەرەجەلەر بويىنشا ەكسپورتقا نەمەسە يمپورتقا رۇقساتتى بەيىندى كوميتەتتىڭ باسشىسى عانا بەرە الادى. جەمقورلىق سحەماسى بويىنشا كوميتەتتىڭ ەكى باس ساراپشىسى وسى قۇزىرەتكە زاڭسىز يە بولعان. قىلمىستىق سحەماعا تۇركىستان، جامبىل، اقتوبە جانە قوستاناي وبلىستارى، الماتى جانە شىمكەنت قالالارى بويىنشا وڭىرلىك ينسپەكتسيالاردىڭ ينسپەكتورلارى دا تارتىلعان. ءاربىر رۇقسات ءۇشىن توپ قاتىسۋشىلارىنىڭ نەمەسە ولاردىڭ تۋىستارىنىڭ جەكە كارتالارىنا 10-نان 50 مىڭ تەڭگەگە دەيىن اقشا اۋدارىلىپ وتىرعان. ماسەلەن، تەك تۇركىستان وبلىسى بويىنشا كوميتەتتىڭ اۋماقتىق ينسپەكسياسىنداعى باس ماماننىڭ شوتىنا 2020 -جىلدان باستاپ 45 ميلليون تەڭگەدەن استام قارجى تۇسكەن. كوميتەت باس ساراپشىسىنىڭ ايەلىنىڭ كارتاسىنا 13,5 ميلليون تەڭگەدەن استام قاراجات تۇسكەن»، - دەلىنگەن اگەنتتتىكتىڭ باسپا ءسوز قىزمەتى تاراتقان اقپاراتتا.

25- تامىزدا باستالعان ارنايى وپەراتسيانىڭ قورىتىندىسى بويىنشا 10-نان استام لاۋازىمدى تۇلعاعا ايىپ تاعىلىپ وتىر.

«ولاردىڭ كوبى كىناسىن مويىندادى. ءۇش ايىپتالۋشىعا، ونىڭ ىشىندە كوميتەتتىڭ ورتالىق اپپارات قىزمەتكەرلەرى قاماۋعا الىنعان. تەرگەۋ جالعاسۋدا»، - دەلىنگەن رەسمي مالىمەتتە.

اۆتور: ەسىمجان ناقتىباي