يران يادرولىق كەلىسسوزدەر جۇرگىزۋگە دايىن - يران پرەزيدەنتى

نۇر- سۇلتان. قازاقپارات - يران الەمنىڭ جەتەكشى ەلدەرىمەن يادرولىق كەلىسىم بويىنشا كەلىسسوز جۇرگىزۋگە دايىن. ءبىراق ول ەش قىسىمسىز ءجۇرىپ، ا ق ش سانكسياسىنىڭ الىنۋىنا اكەلۋى ءتيىس. مۇنداي مالىمدەمەنى يران پرەزيدەنتى يبراگيم رايسي جاسادى.

ونىڭ ايتۋىنشا، ۇكىمەت قازىر باتىس ەلدەرىمەن يراننىڭ يادرولىق باعدارلاماسى بويىنشا كەلىسسوز جۇرگىزۋدى قاراستىرىپ جاتىر.

ايتا كەتەيىك، بۇعان دەيىن فرانسيا مەن گەرمانيا تەگەراندى ەلدەگى ماۋسىم ايىنداعى سايلاۋدان كەيىن وسى ماسەلەگە قاتىستى دوڭگەلەك ۇستەل باسىنا ورالۋدى شاقىرعان ەدى. ال وتكەن ايدا باتىس ەلدەرى يراننىڭ ۋراندى بايىتۋ ءۇشىن ءوندىرىس قۋاتىن ارتتىرعانىنا الاڭداۋشىلىعىن بىلدىرگەن.

يبراگيم رايسي، يران پرەزيدەنتى:

- بۇعان دەيىن وسى ماسەلەگە قاتىستى كەلىسسوز جالعاساتىنىن ايتقام. ءبىراق بۇل ىستە ەشقانداي قىسىم كورسەتىلمەۋى ءتيىس. ا ق ش پەن ەۋروپا ەلدەرى مۇنداي ارەكەت ەش ناتيجە بەرمەيتىنىن كوردى. الداعى كەلىسسوزدە ەلگە سالىنعان سانكسيالاردىڭ الىنۋىنا كۇش سالامىز. ءبىراق ءبىز ۇلتتىق مۇددەمىزدى دە ەشقاشان اياق استى ەتپەيمىز.