قازاقستاندا «دىنگە سەنبەيتىندەر قۇقىعى» تۇسىنىگى ەنگىزىلەدى - ءدىن ىستەرى كوميتەتى
بۇل تۋرالى ق ر اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ ءتوراعاسى ەرجان نۇكەجانوۆ ايتىپ بەردى، دەپ حابارلايدى قازاقپارات ءتىلشىسى.
«2017 -جىلى بۇرىنعى ءدىن ىستەرى جانە ازاماتتىق قوعام مينيسترلىگى دەيستەر مەن اتەيستەردىڭ قۇقىقتارىن قورعاۋ تۋرالى زاڭ جوباسىن باستاۋعا تىرىستى. قازىرگى ۋاقىتتا وسى زاڭدى ەنگىزۋ نەمەسە ازىرلەۋ بويىنشا جۇمىس جۇرگىزىلىپ جاتىر ما؟» ، - دەگەن سۇراق قويىلدى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
«بۇعان دەيىن ءوز باياندامامدا دىنگە سەنەتىندەردىڭ دە، سەنبەيتىندەردىڭ دە قۇقىقتارىن تولىق قامتاماسىز ەتۋگە تىرىساتىنىمىزدى ايتتىم. وسىعان بايلانىستى ءبىز الەمدىك تاجىريبەگە سۇيەنە وتىرىپ، ناقتى تۇزەتۋلەر اياسىندا «دىنگە سەنبەيتىندەر قۇقىعى» تۇسىنىگىن ەنگىزگىمىز كەلەدى. ياعني، قازىر «دىنگە سەنەتىندەر قۇقىعى» بار، سونىمەن بىرگە «دىنگە سەنبەيتىندەر قۇقىعىن» دا ەنگىزگىمىز كەلەدى»، - دەپ جاۋاپ بەردى ە. نۇكەجانوۆ.
ە. نۇكەجانوۆ قازاقستاننىڭ زايىرلى مەملەكەت ەكەنىن جانە دىنگە، كونفەسسياعا، ەتنوسقا قاراماستان زاڭ بارىنەن جوعارى تۇراتىنىن اتاپ ءوتتى.
«ءبىز وسىعان ۇمتىلامىز جانە زاڭ ورىندالادى»، - دەدى ە. نۇكەجانوۆ.
