ءدىن سالاسىنداعى وزەكتى ماسەلەلەر تالقىلاناتىن جاڭا ديالوگ الاڭى اشىلدى
بۇل تۋرالى ق ر اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ ءتوراعاسى ەرجان نۇكەجانوۆ ايتىپ بەردى، دەپ حابارلايدى قازاقپارات ءتىلشىسى.
«وسىعان دەيىن ايتىلىپ كەلگەن ءدىن سالاسىنداعى مامان تاپشىلىعى ماسەلەسى قازىر شەشىمىن تاۋىپ كەلەدى دەۋگە بولادى. جىل سايىن ءدىنتانۋ يسلامتانۋ، تەولوگيا ماماندىقتارى بويىنشا 500 گە جۋىق مامان دايىندالادى. جاس ماماندارمەن تۇراقتى بايلانىس ورناتۋ ماقساتىندا «YZ CLUB» ديالوگ الاڭىن اشتىق. بۇل پلاتفورما جاستارمەن ءدىن سالاسىنداعى وزەكتى ماسەلەلەردى تالقىلاپ، جاڭاشىل باستامالاردى جۇزەگە اسىرۋعا ءوز ىقپالىن تيگىزەدى دەپ ويلايمىز»، - دەدى ە. نۇكەجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
بۇدان باسقا، كوميتەت حالىقپەن تۇراقتى كەرى بايلانىس ورناتۋ ماقساتىندا «حالىققا قىزمەت - ماڭىزدى مىندەت» جوباسىن باستادى.
«بۇل جوبادا كوميتەت Instagram, Facebook الەۋمەتتىك جەلىلەرىندە تىكەلەي ەفيرگە شىعىپ، اتقارىلعان جۇمىستار تۋرالى بايانداپ، حالىقتى تولعاندىرىپ جۇرگەن سۇراقتارعا جاۋاپ بەرەدى. جالپى ءقازىر ەلىمىزدەگى ءدىني احۋال تۇراقتى. بەلگىلى ءبىر ماسەلەلەر تۋىنداپ وتىرادى، ونى جۇمىس بارىسىندا شەشىپ وتىرامىز. ەڭ باستىسى - اقپاراتتىق سالاعا كوڭىل ءبولۋ كەرەك. اقپاراتتى العاندا دا تالعاممەن، سانالى تۇردە قاراعان دۇرىس»، - دەيدى كوميتەت ءتوراعاسى.
ايتا كەتەيىك، بيىل ءبىرىنشى جارتىجىلدىقتا 84 مىڭنان استام ادام الەۋمەتتىك جەلىدەگى راديكالدى توپتاردان شىعارىلدى. ءدىني ەكسترەميزم مەن تەرروريزم يدەيالارىن ناسيحاتتايتىن 80 مىڭنان استام ماتەريال جويىلىپ، 300 دەن استامى بۇعاتتالعان.
