قازاقستاندا الەۋمەتتىك ماڭىزدى ساۋدا الاڭدارىنداعى باعا دەڭگەيى تەكسەرىلەدى
بۇل تۋرالى ۇكىمەت وتىرىسىندا باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين ايتتى، دەپ حابارلايدى قازاقپارات ءتىلشىسى.
«اگەنتتىك بارلىق الەۋمەتتىك ماڭىزى بار تاۋار نارىقتارى بويىنشا تەكسەرۋ ءىس- شارالارىنىڭ جاڭا كەشەنى باستالعانىن حابارلايدى. الەۋمەتتىك ماڭىزى بار ازىق- تۇلىك تاۋارلارى، جانار- جاعارماي جانە قۇرىلىس ماتەريالدارى نارىقتارىنان باسقا، بۇل - ۇيالى بايلانىس، ينتەرنەت قىزمەتتەرى، دارىلىك زاتتار، مەديتسينالىق بۇيىمدار، زەرتحانا قىزمەتتەرى، تۇرعىن ءۇي- كوممۋنالدىق شارۋاشىلىق، دوموفوندار، ليفت، باسقارۋشى كومپانيالار، بيللينگتىك قىزمەتتەر نارىقتارى. تولەم ۇيىمدارى قىزمەتتەرىنىڭ باعالارىن، اسىرەسە كوممۋنالدىق قىزمەتتەرگە، مەملەكەتتىك مونوپوليالار قىزمەتتەرىنە، مەملەكەتتىك جانە جەكەشە وپەراتورلاردىڭ قىزمەتتەرىنە اقشا اۋدارۋ كەزىندە تومەندەتۋ بويىنشا شارالار قابىلداناتىن بولادى» ، - دەدى س. جۇمانعارين.
ونىڭ ايتۋىنشا، شاعىمداردىڭ كوپتىگىنە بايلانىستى، مۇناي ونىمدەرىن، سۇيىتىلعان گاز، ەلەكتر ەنەرگياسىن وتكىزۋ كەزىندە تاۋار بيرجالارىن قوسا العاندا، بارلىق ماڭىزدى جۇمىس ىستەپ تۇرعان ساۋدا الاڭدارى باعالىق ءسوز بايلاسۋ جانە ساۋدا- ساتتىققا قول جەتكىزۋدى شەكتەۋ تۇرعىسىنان تەكسەرىلەدى.
«وسىلايشا، حالىق ءۇشىن بارلىق ماڭىزدى تاۋار نارىقتارىندا باعالاردى كەشەندى تومەندەتۋ جۇمىستارى جالعاستىرىلاتىن بولادى»، - دەدى اگەنتتىك باسشىسى.
