ەكى ەلدەن زەينەتاقى الىپ كەلگەن س ق و تۇرعىنى زاڭسىز العان اقشانى قايتارماق
س ق و سوتى باسپا ءسوز قىزمەتىنىڭ مالىمەتىنشە، 5 بالاسى بار ايەل ەڭبەك، حالىقتى الەۋمەتتىك قورعاۋ جانە كوشى- قون كوميتەتىنىڭ س ق و بويىنشا دەپارتامەنتىن سوتقا بەرگەن. وعان 2020 -جىلدىڭ 1-جەلتوقسانىنان باستاپ زەينەتاقى بەرۋ توقتاتىلعان. سوت ايەلگە مەملەكەتتىك ورگاننىڭ شەشىمىمەن ەكى مەملەكەتتىڭ - قازاقستان رەسپۋبليكاسى مەن رەسەي فەدەراتسياسى اۋماعىندا زەينەتاقى تولەمدەرىن ەكى رەت الىپ كەلۋىنە بايلانىستى زەينەتاقى بەرۋدىڭ توقتاتىلعانىن انىقتادى.
كورشى مەملەكەتتەن قازاقستانعا قونىس اۋدارعان زەينەتكەر زەينەتاقى مەن الەۋمەتتىك اۋدارىمداردى رەسىمدەۋ بارىسىندا باسقا ۆەدومستۆودان زەينەتاقى جانە الەۋمەتتىك تولەمدەر تاعايىندالماعاندىعى تۋرالى جالعان اقپارات بەرگەن.
«رەسەي فەدەراتسياسىندا تالاپكەر 2009 -جىلدىڭ 10-ساۋىرىنەن باستاپ 5 بالاسى بار كوپ بالالى انا رەتىندە زەينەتاقى الۋشى بولعان. قازاقستان رەسپۋبليكاسىنىڭ ازاماتتىعىن قابىلداعاننان كەيىن دە تالاپكەر رەسەي فەدەراتسياسىندا تاعايىندالعان زەينەتاقىنى الۋدى جالعاستىردى. ال 2014 -جىلعى 22 -قىركۇيەكتەن باستاپ ق ر زەينەتاقى الا باستادى جانە 2016 -جىلعى 30-ساۋىرگە دەيىن ەكى مەملەكەتتىڭ اۋماعىندا زەينەتاقى الىپ كەلگەن»، - دەيدى باسپا ءسوز حابارلاماسىندا.
1992 -جىلعى 13-ناۋرىزداعى «ت م د- عا قاتىسۋشى مەملەكەتتەر ازاماتتارىنىڭ زەينەتاقىمەن قامسىزداندىرۋ سالاسىنداعى قۇقىقتارىنىڭ كەپىلدىكتەرى تۋرالى» كەلىسىمگە سايكەس، زەينەتكەر كەلىسىمگە قاتىسۋشى مەملەكەتتەر شەگىندە قونىس اۋدارعان كەزدە، زەينەتاقى ءتۇرى زەينەتكەردىڭ جاڭا تۇرعىلىقتى جەرى بويىنشا زاڭنامادا كوزدەلسە، بۇرىنعى تۇرعىلىقتى جەرى بويىنشا زەينەتاقى تولەۋ توقتاتىلادى.
كوپ بالالى انانىڭ زەينەتاقىسىن ەكى مەملەكەت تە بىرتىندەپ تولەۋدى توقتاتقان، بۇل تالاپكەردىڭ پىكىرىنشە، ونىڭ زەينەتاقى الۋ قۇقىعىن بۇزدى. سوتتا تاراپتار تاتۋلاسۋ تۋرالى كەلىسىمگە كەلدى. ەندى دەپارتامەنت 2021 -جىلعى 20-قىركۇيەككە دەيىن مەملەكەتتىك زەينەتاقى تولەمىن تاعايىنداۋ تۋرالى شەشىمدى قاراۋعا جانە بەكىتۋگە مىندەتتى.
ايەلدىڭ 2020 -جىلعى 1-جەلتوقساننان باستاپ الماي كەلگەن زەينەتاقىسىن وسى جىلدىڭ قازان ايىندا بەرۋى ءتيىس. ال سوتقا ارىزدانعان ايەل ءوز كەزەگىندە 2014 -جىلدىڭ 22-قىركۇيەگى مەن 2016 -جىلدىڭ 30-ءساۋىرى ارالىعىندا زاڭسىز الىنعان زەينەتاقى تولەمدەرىنىڭ سومماسىن - 726230 تەڭگەنى كەلەسى جىلدىڭ 1-ماۋسىمىنا دەيىنگى مەرزىمدە قايتارۋعا مىندەتتەندى.
