ۇلى ابايدىڭ العاش جارىق كورگەن كىتابى حالىقارالىق كورمەگە قويىلدى - فوتو

نۇر-سۇلتان. قازاقپارات - قازاقستاندىق زيالى قاۋىم وكىلدەرى، كىتاپحاناشىلارى جانە بلوگەرلەردەن قۇرىلعان دەلەگاتسيا وكىلدەرى كەشە رەسەي مەملەكەتىنە كەلدى.

توپ مۇشەلەرى «سوعىس جانە بەيبىتشىلىك» اتتى حالىقارالىق ەكسپەديتسيا جوباسى بويىنشا رەسەي مەملەكەتتىك كىتاپحاناسىندا ۇلى اقىندار اباي، جامبىل جابايەۆ جانە مۇقاعالي ماقاتايەۆتىڭ شىعارماشىلىعىنا ارنالعان حالىقارالىق كورمەگە قاتىسۋدا.

كورمەدە رەسەيلىك جانە قازاقستاندىق كىتاپحانالاردىڭ سيرەك كەزدەسەتىن جانە ەكسكليۋزيۆتى باسىلىمدارى ۇسىنىلادى. سونداي-اق، اقىن اباي قۇنانباي ۇلىنىڭ جارىق كورگەن العاشقى كىتابى دا قويىلدى.

قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا ۇيىمداستىرىلعالى وتىرعان حالىقارالىق ەكسپەديتسياعا رەسەي مەملەكەتتىك كىتاپحاناسىنىڭ ديرەكتورى ۆاديم دۋدا، ق ر ۇلتتىق اكادەميالىق كىتاپحاناسىنىڭ باسشىسى ءۇمىتحان مۇڭالبايەۆا، رەسەي جازۋشىلار وداعىنىڭ باسقارما ءتوراعاسى نيكولاي يۆانوۆ، ر ف جازۋشىلار وداعىنىڭ مۇشەسى گريگوري پرياحين، ق ر جازۋشىلار وداعىنىڭ مۇشەلەرى بايانعالي ءالىمجانوۆ، مەرەي قارت، الىبەك بايبولوۆ، ە ۇ ۋ پروفەسسورى سەيداحمەت قۇتتىقادام جانە باسقا دا ەكى ەلدىڭ عىلىمي جانە شىعارماشىلىق زيالى قاۋىم وكىلدەرى قاتىسۋدا.

باعدارلامادا ۇلى اقىندار اباي مەن پۋشكيننىڭ ەسكەرتكىشتەرىنە گۇل شوقتارىن قويۋ جوسپارلانعان. قازاقستان تاريحىن، مادەنيەتى مەن ادەبيەتىن ناسيحاتتاۋ ماقساتىندا ۇيىمداستىرىلعان ءىس-شاراعا ۇلى وتان سوعىسىنداعى جەڭىستىڭ 76 جىلدىعى، ماسكەۋ شايقاسىنىڭ 80 جىلدىعى جانە رجيەۆ تۇبىندەگى شايقاستاردىڭ باستالۋى اياسىندا ماسكەۋ مەن ماسكەۋ وبلىسىنداعى جاۋىنگەرلەردىڭ جەرلەنگەن جەرلەرىنە بارۋ دا جوسپارلانىپ وتىر.

جوبا قاتىسۋشىلارى ۇلى وتان سوعىسى كەزىندەگى مەموريالدىق جانە مۇراجاي كەشەندەرىن ارالاپ، رجيەۆ اۋدانى ترۋبينو اۋىلىنىڭ تۇرعىندارىمەن كەزدەسۋلەرگە قاتىسادى، سونداي-اق، ماسكەۋ قالاسى م. ي. رۋدومينو اتىنداعى شەتەل ادەبيەتى كىتاپحاناسىندا «كىتاپحانالار- جەڭىستىڭ كۋاگەرلەرى» جوباسى بويىنشا دوڭگەلەك ۇستەلدەر وتكىزەدى. بۇل جوبا ۇلى جەڭىستىڭ 75 جىلدىعىنا ارنالعان ت م د ەلدەرى مەن شانحاي ىنتىماقتاستىق ۇيىمىنىڭ ۇلتتىق كىتاپحانالارىمەن جۇزەگە اسىرىپ، جەڭىس تۋىنا ۇلەس قوسقان ادامدار تۋرالى كىتاپتاردىڭ، باسپا شىعارمالارىنىڭ جانە جازبالاردىڭ باي ماتەريالدارىن جينادى جانە م. ي. رۋدومينو اتىنداعى كىتاپحانانىڭ سايتىنا ورنالاستىرىلدى.

«بالالار مەن جاسوسپىرىمدەر ادەبيەتى» جىلىنىڭ باعدارلاماسىن جۇزەگە اسىرا وتىرىپ، جوبا اياسىندا رەسەي جازۋشىلار وداعىمەن، بالالار اۆتورلارىمەن جانە يلليۋستراتورلارمەن كەزدەسۋلەر مەن رەسەي مەملەكەتتىك بالالار كىتاپحاناسىندا دوڭگەلەك ۇستەل دە وتكىزۋ جوسپارعا الىنىپ وتىر. قازاقستاندىق جانە رەسەيلىك زيالى قاۋىمنىڭ كەزدەسۋلەرى مەن بىرلەسكەن ءىس-شارالارى مەملەكەتارالىق بايلانىستاردى نىعايتادى جانە قازاقستان مەن رەسەي اراسىنداعى ءبىرىڭعاي مادەني- پاتريوتتىق كەڭىستىكتى قالىپتاستىرۋدىڭ التىن كوپىرى بولىپ تابىلادى.

سونداي-اق، جوبانى ۇيىمداستىرۋشىلار مەن قاتىسۋشىلاردىڭ الدىندا تۇرعان ماڭىزدى مىندەت - قازاقستان مەن رەسەي كىتاپحانالارىنىڭ وقىرماندارىن تانىستىرۋ جانە بالالار مەن جاستارمەن باسقا دا پاتريوتتىق ءىس- شارالار وتكىزۋ ءۇشىن مالىمەتتەر بازاسى مەن ماتەريالدار جيناعىن قالىپتاستىرۋ بولىپ تابىلادى.

ADEBIPORTAL. KZ