ەلوردادا جول جوندەپ جاتقان جۇمىسشىلاردى سوققىعا جىعىپ، پىشاقتاپ كەتتى

نۇر-سۇلتان. قازاقپارات - ەلوردادا جول-قۇرىلىس جۇمىسىن جۇرگىزىپ جاتقان جۇمىسشىلاردى سوققىعا جىعىپ، پىشاقتاپ كەتتى، دەپ حابارلايدى قازاقپارات نۇر-سۇلتان قالالىق پوليتسيا دەپارتامەنتىنە سىلتەمە جاساپ.

وقيعا سالدارىنان قالالىق اۋرۋحاناعا پىشاقپەن جاراقاتتانعان ءۇش جۇمىسشى جەتكىزىلدى.

تۇندە «102» ارناسىنا الاش تاس جولى بويىنداعى كوپىردە جاپپاي توبەلەس بولىپ جاتىر دەگەن حابارلاما كەلىپ ءتۇستى.

جول-قۇرىلىس جۇمىستارىن جۇرگىزىپ جاتقان جۇمىسشىلار بريگاداسىنا شابۋىل جاسالعان. ساعات 00:40 شاماسىندا «لەكسۋس» كولىگىنە مىنگەن بەلگىسىز ەر ادامدار جوندەۋ ءجۇرىپ جاتقان جەرگە قاراي وتپەكشى بولعان.

سوزگە كەلىپ، كەيىن توبەلەسكە ۇلاسقان جانجال بارىسىندا «لەكسۋس» جۇرگىزۋشىسى مەن جولاۋشىلارى جۇمىسشىلارعا پىشاق سالعان. وقيعا ورنىنا ۋاقتىلى جەتكەن پوليتسەيلەر كولىك جۇرگىزۋشىسى مەن جولاۋشىلارىن ۇستادى.

وقيعا ورنىن ءتىنتۋ كەزىندە پىشاق تابىلىپ، تاركىلەندى. قازىرگى ۋاقىتتا توبەلەستى باستاعان 29 جانە 20 جاستاعى ەكى ازامات ۇستالىپ، پوليتسيا دەپارتامەنتىنىڭ ۋاقىتشا ۇستاۋ وقشاۋلاعىشىنا قامالدى.

ادام دەنساۋلىعىنا قاساقانا اۋىر زيان كەلتىرۋ فاكتىسى بويىنشا قىلمىستىق ءىس قوزعالدى. تەرگەۋ ءجۇرىپ جاتىر.