استانادا ءبىر كۇندە ەكى بالا كوپقاباتتى ءۇيدىڭ تەرەزەسىنەن قۇلاپ كەتتى

نۇر-سۇلتان. قازاقپارات - ءبىر كۇندە استانادا ەكى بالا كوپقاباتتى ءۇيدىڭ تەرەزەسىنەن قۇلاپ كەتتى، دەپ حابارلايدى قازاقپارات نۇر-سۇلتان قالالىق پوليتسيا دەپارتامەنتىنە سىلتەمە جاساپ.

5- قىركۇيەك كۇنى ساعات 13.20 دا ەكى جاسار ءبۇلدىرشىن اسۇيدە ۇستەل ۇستىندە ويناپ ءجۇرىپ، تەرەزەگە ءمىنىپ كەتكەن.

اناسى وسى كەزدە سول بولمەدە بولعان. اناسىنىڭ ايتۋىنشا، ول بالانى ۇستاپ الايىن دەگەن، ءبىراق ۇلگەرمەي قالعان. ول موسكيت تورىنا بار سالماعىمەن سۇيەنىپ، 3 قاباتتان تەرەزەدەن قۇلاپ كەتكەن.

ءبۇلدىرشىن ءتۇرلى دەنە جاراقاتتارىمەن اۋرۋحاناعا جەتكىزىلدى. وسى كۇنى ساعات 15.30 دا 4 جاسار بالا اناسىمەن بىرگە رىسقۇلبەكوۆ كوشەسىندە تۋىستارىنىڭ ۇيىندە قوناقتا بولعان. بالا جاتىن بولمەگە ويناۋعا كەتەدى، ول بولمەنىڭ تەرەزەسى اشىق قالعان.

تەرەزە الدىنا شىعىپ، موسكيت تورىنا سۇيەنگەن بالا 6 قاباتتان قۇلاپ كەتكەن. كەيىن اناسى اشىق تۇرعان تەرەزەدەن بالاسىنىڭ جەردە جاتقانىن كورەدى.

بالا جانساقتاۋ بولىمىنە جەتكىزىلدى، ءبىراق ونى امان الىپ قالۋ مۇمكىن بولمادى. پوليتسەيلەردىڭ ايتۋىنشا، جىل باسىنان بەرى 31 بالا كوپقاباتتى ءۇيدىڭ تەرەزەسىنەن قۇلاپ كەتكەن، سونىڭ تورتەۋى كوز جۇمدى.

ءتارتىپ ساقشىلارى ەرەسەكتەردەن قاۋىپسىزدىك ەرەجەلەرىن قاتاڭ ساقتاۋدى سۇرايدى. بالالاردى ەشبىر جاعدايدا قاراۋسىز قالدىرماي، اشىق تۇرعان تەرەزەنىڭ قاسىندا ويناۋعا رۇقسات بەرمەۋ كەرەك.

موسكيت تورلارى قاۋىپسىز كورىنگەنىمەن، بالا وعان سۇيەنگەندە سالماقتى كوتەرە المايدى. تەرەزەگە ارنايى قۇلىپ قوندىرۋ نەمەسە تۇتقاسىن الىپ تاستاۋ قاجەت.