جەتىنشى ارميا حالىقارالىق ويىندارى اياقتالدى
وعان 40-تان استام ەلدىڭ اسكەري قىزمەتشىلەرى قاتىستى. جارىس ءبىر مەزگىلدە 23 پوليگوندا جانە ءۇش تەڭىزدىڭ سۋ ايلاعىندا ءوتتى. قازاقستاندىق اسكەري قىزمەتشىلەر ونىڭ ىشىندە ون ءبىر كونكۋرسقا قاتىستى، ولاردىڭ ەكەۋى ەلىمىزدە ءوتتى.
«ءماتىبۇلاق» پوليگونىندا وتكەن «سۇڭقار اڭشىلىعى» كونكۋرسىنا بەلارۋس، يران، قازاقستان جانە رەسەي اسكەري قىزمەتشىلەرى قاتىستى. قاتىسۋشىلار اۋە بارلاۋىن جۇرگىزۋ، بەرىلگەن نىسانداردى ىزدەۋ، ۇشقىشسىز ۇشۋ اپپاراتتارىنا قىزمەت كورسەتۋ جانە ولاردى ۇشۋعا دايىنداۋ بويىنشا جارىستى، سونداي- اق وق اتۋدان شەبەرلىك كورسەتتى. سايىس قورىتىندىسىنا كەلسەك، ءبىرىنشى ورىندا قازاقستان، ەكىنشى ورىندا بەلارۋس، ءۇشىنشى ورىندا رەسەي.
سول پوليگوندا «ارتيللەريادان وق اتۋ شەبەرلەرى» سايىسىندا ازەربايجان، بەلارۋس، ۆەتنام، يران، قازاقستان، رەسەي، سيريا، تاجىكستان جانە وزبەكستان قارۋلى كۇشتەرىنىڭ مينااتقىش ەسەپتوپتارى قاتىستى. كونكۋرستىڭ ءۇش كەزەڭىندە اسكەري قىزمەتشىلەر جىلدامدىق پەن مەرگەندىكتى كورسەتەتىن جاۋىنگەرلىك تاپسىرمالاردى ورىندادى. ولار جەكە جارىستا، تۇنگى سپرينت جانە فينالدىق ەستافەتادا جەڭىس ءۇشىن كۇرەستى. جەڭىسكە جەتكەن - قازاقستان كومانداسى. ەكىنشى ورىندى رەسەي، ءۇشىنشى ورىندى ازەربايجان يەلەندى.
ريازاندا «دەسانت ۆزۆودى» كونكۋرسى ءوتتى. ىرىكتەۋ كەزەڭدەرىنەن وتكەن دەسانتتىق- شابۋىلداۋ اسكەرلەرى بولىمشەلەرىنىڭ اسكەري قىزمەتشىلەرى جارىسقا قاتىستى. قاتىسۋشىلار ۆزۆود قۇرامىندا دەسانت ءتۇسىردى، مارش جاسادى، جاۋىنگەرلىك كولىكتەردە جارىستى جانە قويان- قولتىق ۇرىس جۇرگىزدى. بۇل كونكۋرستا ءبىرىنشى ورىندى رەسەي كومانداسى السا، ال ەكىنشى ورىندى قازاقستان مەن قىتاي اسكەري قىزمەتشىلەرى ءوزارا ءبولىستى، ءۇشىنشى ورىن بەلارۋس كومانداسىنا بۇيىردى.
«تاكتيكالىق مەرگەن» كونكۋرسىندا اسكەري قىزمەتشىلەر عيماراتتاعى، باتپاقتى جەردەگى جانە ورمانداعى ۇرىستى ءتۇرلى جاعدايدا كورنەكى كورسەتىپ، تاپسىرمالاردى ورىندادى، سونداي- اق جاۋىنگەرلىك قۇرامدا ەكەۋدەن جانە تورتەۋدەن توپتاسىپ جارىستى. ارميا حالىقارالىق ويىندارىنىڭ جاڭا كونكۋرسىندا رەسەي كومانداسى جەڭىمپاز اتاندى، ەكىنشى ورىندى قىتاي يەلەندى، ال ۇزدىك ۇشتىكتى قازاقستان تۇيىقتادى.
تىۆادا وتكەن «اتتار مارافونىنا» قازاقستاندىق تاۋ- ەگەرلىك پولكتىڭ اسكەري قىزمەتشىلەرى قاتىستى. قازاقستاندىق اسكەري شاباندوزدار بارلىق كەزەڭدەردى ابىرويمەن ەڭسەردى. قاتىسۋشىلار ءۇشىن ءارتۇرلى تاپسىرمالار مەن كەدەرگىلەر، ءجۇز شاقىرىمنان اساتىن كۇردەلى جولدى ەڭسەرۋى، الىس قاشىقتىققا جارىس ناعىز سىناق بولدى. جالپى كوماندالىق ەسەپتە رەسەيلىك كوماندا جەڭىسكە جەتتى. ەكىنشى ورىندى موڭعوليا مەن وزبەكستان كوماندالارى ءوزارا ءبولىستى. ءۇشىنشى ورىندى قازاقستاندىق كوماندا يەلەندى.
ارمەنيانىڭ ديليجان قالاسىندا «بەيبىتشىلىك جاۋىنگەرى» كونكۋرسى ءوتتى. ەل اسكەرىنەن اتالعان كونكۋرسقا قاتىسۋ ءۇشىن كەلىسىمشارت بويىنشا ۇزدىك اسكەري قىزمەتشىلەر ىرىكتەلدى. كونكۋرسقا كاسىبي جارىستار، سونداي- اق قاتىسۋشىلاردىڭ شىعارماشىلىق قابىلەتتەرى مەن تالانتتارىن كورسەتەتىن كەزەڭدەر كىردى. وعان التى ەلدىڭ اسكەري قىزمەتشىلەرى قاتىستى. جارىس قورىتىندىسى بويىنشا ءبىرىنشى ورىندى ارمەنيا كومانداسى، ەكىنشى ورىندى رەسەي، ءۇشىنشى ورىندى قازاقستان يەلەندى.
ماسكەۋ ماڭىنداعى پاتريوت ساياباعىندا «اسكەر مادەنيەتى» كونكۋرسى ءوتتى. وعان ءبىزدىڭ ەلىمىزدىڭ اتىنان ۇلتتىق اسكەري- پاتريوتتىق ورتالىقتىڭ شىعارماشىلىق ۇجىمى جانە قارۋلى كۇشتەردىڭ اسكەري- تاريحي مۋزەيىنىڭ قىزمەتكەرلەرى قاتىستى. شىعارماشىلىق جارىسقا جيىرما ەلدىڭ كومانداسى قاتىستى. كونكۋرستا ءبىرىنشى ورىندى رەسەي، ەكىنشى ورىندى قىتاي، ءۇشىنشى ورىندى قازاقستان مەن بەلارۋس ەلدەرى يەلەندى.
اسكەري پوليتسەيلەر سەربيادا وتكەن «ءتارتىپ ساقشىسى» كونكۋرسى بارىسىندا كاسىبي شەبەرلىك تانىتتى. وعان يران، قازاقستان، كاتار، كيپر، رەسەي جانە سەربيا كوماندالارى قاتىستى. جارىستار جەكە جانە كوماندالىق كەزەڭدەردى قامتىدى. سوڭعى جانە اسا كۇردەلى سىناق «باتىرلار جارىسى» بولدى. قاتىسۋشىلار ۇزىندىعى ون ەكى شاقىرىمدىق كۇدەرگى كەدەرگىلەردى ەڭسەرۋى ءتيىس بولدى. كونكۋرستا سەربيا قۇراماسى جەڭىمپاز اتاندى. ەكىنشى ورىن رەسەيگە، ءۇشىنشى ورىن قازاقستانعا بۇيىردى.
«ەلبرۋس شەڭبەرىنە» قازاقستاننىڭ تاۋداعى دايىندىق ورتالىعىنىڭ اسكەري الپينيستەرى قاتىستى. جارىس كاباردينو- بالقارياداعى «تەرسكول» پوليگونىندا ءوتتى. بىرنەشە ارنايى تاپسىرمالاردى قۇراعان كونكۋرس بارىسىندا قاتىسۋشىلار جەكە جانە بايلامدار ارقىلى تاۋعا ورمەلەپ جارىستى، جاساندى تاۋ بەدەرىنە شابۋىل جاسادى، تاۋلى جەرلەردە باعدارلاۋدى پىسىقتادى، تاسادان وق جاۋدىردى، تاۋداعى وزەن ارقىلى ءوتتى جانە ەلبرۋس شىڭىنا شىقتى. وعان ابحازيا، ارمەنيا، ءۇندىستان، قازاقستان، قىتاي، پاكىستان، وزبەكستان، رەسەي جانە وڭتۇستىك وسەتيانىڭ اسكەري الپينيستەرى قاتىستى. كونكۋرستا ءبىرىنشى ورىندى رەسەي، ەكىنشى ورىندى وزبەكستان، ءۇشىنشى ورىندى قازاقستان الدى.
يراندا وتكەن سۋ ءۇستى كەمەلەرى ەكيپاجدارىنىڭ «تەڭىز كۋبوگى» جارىسىندا قازاقستاندىق اسكەري تەڭىزشىلەر ازەربايجان، يران جانە رەسەيدىڭ وكىلدەرىمەن جارىستى. قاتىسۋشىلار كەمەنى زاكىرگە قويۋدان تەڭىز ماشىعىن كورسەتتى، ارتيللەريادان وق اتۋدى ورىندادى، اۋە جانە تەڭىز نىسانالارىن الىپ، كەمەنىڭ سىن ساعاتتاعى ومىرشەڭدىگىن كورسەتۋ ءۇشىن كۇرەستى. كونكۋرس قورىتىندىسى بويىنشا يراننىڭ اسكەري تەڭىزشىلەرى ۇزدىك دەپ تانىلدى، ەكىنشى ورىندى رەسەي كومانداسى، ءۇشىنشى ورىندى قازاقستان مەن ازەربايجان ءوزارا ءبولىستى.
تانىمال «تانك بياتلونى» كونكۋرسى بۇل جولى دا ەڭ ۇزدىك تانك ەكيپاجدارىن انىقتادى. جارىستار مىقتى باسەكەلەستىكتە ءوتتى. ءار كوماندا جەڭىسكە ۇمتىلىپ، جاتتىعۋ كەزىندە كورسەتكەن ناتيجەلەردى جاقسارتۋعا جانە جولدا قاتەلىكتەر جىبەرمەۋگە تىرىستى. تانكيستەر اتىس شەپتەرى مەن كەدەرگىلەرى بار كۇردەلى جولدان ءوتتى. ولار جىلدامدىق پەن مانيەۆرلىكتى، نىسانالاردى ءدال كوزدەۋدى، ەكيپاجداردىڭ ۇيلەسىمدى ءىس- قيمىلدى مەن شەبەرلىگىن كورسەتتى. ءبىرىنشى كەزەڭنەن باستاپ قازاقستاندىق اسكەري قىزمەتشىلەر ون توعىز ەلدىڭ قاتىسۋشىلارى اراسىندا ۇزدىك ۇشتىكتە بولدى. فينالدىق ەستافەتانىڭ قورىتىندىسى بويىنشا قازاقستاندىق تانكيستەر ءۇشىنشى ورىنعا يە بولدى. ءبىزدىڭ ەكيپاجدان تەك كونكۋرس يەلەرى مەن قىتاي كومانداسى وزدى.
ارميا حالىقارالىق ويىندارى - ۇزدىك اسكەري مامانداردىڭ جارىستارى عانا ەمەس، بۇل اسكەري قىزمەتشىلەردىڭ جاۋىنگەرلىك دايارلىعىنىڭ جاڭا ءتۇرى. جارىس ارقىلى جاۋىنگەرلەر وزدەرىنىڭ كاسىبي شەبەرلىكتەرىن جەتىلدىرەدى، بەيتانىس پوليگونداردا، باسقا ەلدەردىڭ اسكەري كۇشتەرىمەن وتكىر باسەكەلەستىكتە ارەكەت ەتۋگە ۇيرەنەدى. بۇدان باسقا، بۇل اسكەري ويىندار قاتىسۋشى مەملەكەتتەر اراسىنداعى دوستىق قارىم- قاتىناستى نىعايتۋدا ۇلكەن ماڭىزدى. ءبىزدىڭ جاۋىنگەرلەردىڭ قورجىنىندا ەكى «التىن»، ءبىر «كۇمىس» جانە سەگىز قولا مەدال. قازاقستاندىق ءبىر دە ءبىر كوماندا مەدالسىز قالعان جوق. بيىل سانيتارلىق- ەپيدەميولوگيالىق جاعدايعا بايلانىستى قازاقستاننىڭ قارۋلى كۇشتەرى 11 بايقاۋعا عانا قاتىسۋمەن شەكتەلدى.
