داۋرەن ابايەۆ: ەندىگى مىندەت - مەملەكەتتىك ءتىلدى ەلىمىزدەگى ۇلتارالىق قارىم- قاتىناس تىلىنە اينالدىرۋ
بۇل تۋرالى «ءسوز تۇزەر» سوزدىگىنىڭ تۇساۋكەسەر راسىمىندە ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ ايتتى، دەپ حابارلايدى قازاقپارات ءتىلشىسى. «سوڭعى كەزدە تەلەۆيزيا مەن راديودا، باسپا ءسوز بەن سايتتاردا ءارتۇرلى قاتەلەردىڭ بەلەڭ الىپ بارا جاتقانى تۋرالى ءجيى ايتىلىپ ءجۇر. ءتىل جاناشىرلارى تىلدىك نورمالاردىڭ بۇزىلۋى جايلى الاڭداشىلىق تانىتىپ كەلەدى. وسىعان وراي پرەزيدەنت اكىمشىلىگى مەن اقپارات جانە قوعامدىق دامۋ مينيسترلىگى بۇل جاعدايدى ساراپتاپ، بەلگىلى عالىمدار مەن ءتىل ماماندارىنىڭ باسىن قوسىپ وسى سوزدىكتى جاساپ شىعاردى. سوزدىك مەملەكەت باسشىسىن تاپسىرىلىپ، پرەزيدەنتتىڭ وڭ باعاسىنا الدى»، - دەدى داۋرەن ابايەۆ سوزدىكتىڭ تۇساۋكەسەرىنە ارنالعان شارادا.
ول تاريحتا انا ءتىلىمىزدىڭ وركەندەگەن ءداۋىرى دە، ساياساتتىڭ سالدارىنان تەجەلگەن تۇستارى دا بولعاندىعىن اتاپ ءوتتى. ءبىراق، ەگەمەندىك جىلدارى قازاق ءتىلى جان- جاقتى دامىپ، بۇگىندە عىلىمنىڭ، تەحنولوگيا مەن بيزنەستىڭ تىلىنە اينالىپ كەلە جاتقانىن باسا ايتتى.
«ەندىگى مىندەت - وسى قارقىندى ودان ارتتىرىپ، مەملەكەتتىك ءتىلدى ەلىمىزدەگى ۇلتارالىق قارىم- قاتىناس تىلىنە اينالدىرۋ. وسى ورايدا مەملەكەت باسشىسى كەشەگى جولداۋىندا: «بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋى ءتيىس. بۇل وتانشىلدىقتىڭ باستى بەلگىسى دەۋگە بولادى» دەپ ناقتى كورسەتتى. بۇل ماقسات جولىندا پاراساتتىلىقتى، قوعامداعى تاتۋلىق پەن ءوزارا سىيلاستىقتى ساقتاۋ وتە ماڭىزدى. بۇعان ءار قازاقستاندىق مۇددەلى بولۋى ءتيىس دەپ سانايمىن»، - دەدى العىسوزىن ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى.
اۆتور: مارلان جيەمباي
